సముద్రాలు ఘోషిస్తూనే ఉంటాయి!

కళారత్న బిక్కి కృష్ణ
83744 39053

Heart is burning rose!
Life is painful poem!

నా దేశప్రజల గుండెల్లో
బాధల సముద్రాలు ఘోషిస్తున్నాయి!
అభద్రతా అరణ్యాలు దట్టంగా వ్యాపిస్తున్నాయి!

పచ్చని బతుకు పొలాలపైకి
ఆకాశం ఎప్పుడు అగ్ని వర్షం
కురిపిస్తుందో... దానికి...
అవకాశవాద రాజకీయం ఎప్పుడు
వ్యాపారవాయువుతో కలిసి ఆజ్యం పోస్తుందో..
తన అధికారదాహం తీర్చుకొంటుందో..
సామ్రాజ్యాన్ని విస్తరించుకొంటుందో తెలియదు!

కార్పొరేట్‌ కలిపురుషుల వేటగాళ్ళ
కనిపించని వ్యాపారాల వలల్లో చిక్కి... సార్క్‌ దేశాల ప్రభుత్వాల తాబేళ్ళు.. ప్రజల చేపలు విలవిల్లాడుతున్నాయి!

దేశంలో సంక్షోభ స్కాములే కాదు..
సంక్షేమ స్కీములు పెరిగి
ధరల భయాల పాములు బుసకొడుతున్నాయి!

శూన్య భవితల ఎడారి శయ్యలపై
ఆశల ఎండమావుల నీడల్లో నిద్రిస్తూ...
నిరుద్యోగులు... కలలు కనడం మానేశారు!
నిరాశల బీరుమత్తులో
క్షణికసుఖాల ఇంద్రియాల క్రీనీడలో జోగుతున్న యువత కనురెప్పలపై డ్రగ్స్‌ మేఘాలు వాలిపోయి
కన్నీటి చరితలు లిఖిస్తున్నాయి!

అమాయక శ్రమజీవుల రెక్కల కష్టందోచి తెగ బలిసిన రాజకీయ తోడేళ్ళు...
అధికార అరణ్యాల ఆధిపత్యం కోసం...
ఛానెళ్ల గుహల్లో గుర్రుగుర్రుమంటూ మాటల మడుగుల్లో రక్తపు మరకలు కడుక్కొంటున్నాయి!
మేధావులైన వెండితెర సృజనకారులు భ్రమల లోకాల కథలకు
రంగులద్ది ప్రజల మెధళ్ళలో..
కనిపించని కలల కళల విషాన్ని
నింపుతూ పబ్బం గడుపుకొంటున్నారు!

ఇప్పుడు అన్ని సంబంధాలు వ్యాపారక్రిములు నిండిన
మేడిపండు పైపై మెరుపులే కదా!
బతకడానికి పనికొచ్చే విద్యల కంటే
మోసగించే విద్యలు నేర్చిన వాళ్ళే
విజేతలై జేజేలందుకొంటున్నారు!

నరహంతక విజేతలు రాసుకున్న చరిత్రలనే..
పరాజితులపిల్లలు పాఠ్యాంశాలుగా చదువుకోవడం విడ్డూరం!
రక్తం మరిగిన సింహాలనే రాజులుగా
ఎన్నుకోవడం.. అమాయక అడవి మృగాల మూర్ఖత్వం!

అందుకే అప్పటికీ ఇప్పటికీ నింగిని నేలను ఏకం చేసే
ధర్మయుద్ధం ఒక్కటీ జరగలేదు!
అన్నీ అధర్మ యుద్ధాలే!
ఆధిపత్య అభిజాత్య జాత్యాహంకార యుద్ధాలే!

నేడు అన్ని దేశాల్లో.. అన్ని ప్రాంతాల్లో
పచ్చనోట్ల విచ్చు కత్తుల వ్యాపార యుద్ధాలే!
పేదల కుత్తుకలు కోయకనే
వారి బతుకుల నెత్తురు చెమటకు
ఖరీదు కట్టే కార్పొరేట్‌ యుద్ధాలే!

నేడు అందరూ విలువలు గాలికొదిలి
కరుణ శిల్పాలుగా మెరవాల్సిన గుండెలను
శిలలుగ మార్చుకొని..
శీలాలకు స్వేచ్ఛావిఫణిలో తాళాలిచ్చి.. నీతికి తిలోదకాలిచ్చి... అవినీతి కాగడాలను అంతటా పట్టుకు తిరుగుతూ.. తెలివిమీరిన కొరివి దెయ్యాలల్లే
భూమండలం చుట్టూ ప్రదక్షిణలు చేస్తున్న
కబ్జాల కబంద బంధుగణాలే!

స్వార్థం లేకుంటే బతకలేవోరు
అని బోధించే ప్రబుద్ధులున్న ప్రతిచోటా...
వేలవేల గౌతమ బుద్ధుళ్ళు పుట్టుకొచ్చినా ఫలితం లేదు!

రాజకీయం లాభసాటి వ్యాపారమై
రాజ్యాంగం స్వార్థపరుల అధికార మంత్రదండంగా మారిన చోట
వేలవేల అంబేద్కరులు జన్మించకపోతే
చారిత్రక ప్రభావిభాత చైతన్యం రాదు!

ఇప్పుడు చింతలచితిలో కాలుతూ జీవశ్చవాలుగా బతికే ప్రజలంతా ఎలాగో చచ్చిపోతామన్న సత్యం తెలుసుకొని...
ఒకచేత్తో... సూర్యబింబం గదనూ
మరోచేత్తో... చంద్రబింబం గొడ్డలిని
అందుకొని అభినవ పరశురాములైపోవాల్సిందే!

అప్పటివరకూ... భూగోళంపై ఏదేశంలో ఉన్నా
ఏ దీవుల్లో జీవిస్తున్నా ప్రజల గుండెల్లో
బాధల సముద్రాలు... ఘోషిస్తూనే ఉంటాయి!
శ్రీలంకల కళంక చరితల
కంకాళాలు నినదిస్తూనే ఉంటాయి!
విముక్తి ఉద్యమాలు పుడుతూనే ఉంటాయి!