అక్షరం కవిత్వంగా వెలిగినంతసేపూ ...

మానాపురం రాజా చంద్రశేఖర్‌
77940 39813

కదలకు
మనసులో కవిత్వం తొణికిసలాడి
కాగితం మీదకు ఒలుకుతుంది!
గుండెలో గూడుకట్టుకున్న దృశ్యాలన్నీ
పొరలు పొరలుగా వీడి
అక్షరనేత్రాలతో బహిరంతర లోకాల్ని దర్శిస్తుంది!
చలన స్ప ృహ అంటే తెలియని కళ్ళకి
జ్వలనస్పర్శను రాజేసి
కొత్త గూడు కడుతుంది!

ఎప్పుడో ఒక స్వేద బిందువుతో
మొదలైన అక్షర ప్రయాణం
అలలు అలలుగా విస్తరించి
అంతర్లోకాల నుంచి
ఆధునిక కవిత్వ పరవళ్ళను తొడుక్కొని
కొత్త బీజాలను నాటుతోంది!
చూపు దీనికి కేంద్రబిందువు!

ఆదికవి నన్నయ్య మొదలుకొని
వర్తమాన తరందాకా అనేకానేక ఆటుపోట్లు!
రాటుదేలిన భావ సంఘర్షణల రాపిళ్ళు!
కీట్స్‌ అంధత్వంలోని
సృజనాత్మక శక్తి పరవళ్ళలోంచి
సానెట్స్‌ పదాల పరవళ్ళ దాకా..
ప్లాబ్లో నెరుడా పదాల మోహరింపు నుంచి..
నల్ల జాతీయుల అస్తిత్వవేదన ప్రతిబింబం
ఏడో తరందాకా
అలెక్స్‌ హెలీ గొంతు వినపడుతూనే ఉంటుంది!

బూర్జువా వ్యవస్థ పుట్టుకలోంచి
పెట్టుబడీదారి సమాజం దోపిడీదాకా
మార్కి ్సజం పరిచిన దారుల్లోంచి
శ్రమ నెత్తుటితో తడిసిన శ్రామిక సౌందర్యం దాకా..

వర్గ పోరాటంతో
శ్రామిక నియంతృత్వాన్ని ఆవిష్కరిస్తూ
మిగుల విలువకి పట్టంకట్టే
చరిత్ర పునరావృతమవుతోంది!
ఫ్రెంచి విప్లవం ఛాయలు నుంచి
బోల్షివిక్‌ రాజకీయ కదలికల దాకా
నెర్రెలిచ్చిన పగుళ్ళ నెగళ్ళు!
చేగువేరా గుండెచప్పుళ్ళ వేగంలోంచి
ఫిడేల్‌ కాస్ట్రో వారసత్వం దాకా
ఎన్నెన్ని మలుపులో... మరెన్ని కుదుపులో..!

ప్రపంచ శాంతికి పట్టంకట్టిన చేతులతో
విస్తరించిన సామ్రాజ్యవాదపు వేళ్ళు
పారిశ్రామిక విప్లవంతో జడలు విప్పి
ప్రపంచీకరణ విస్తరణలో
బహుళజాతి కంపెనీల లోచూపు ఆనవాళ్ళు..
బహుముఖాలుగా అనేక రూపాలుగా
నవ నాగరిక సమాజంలోంచి విచ్చుకొని
పలు సందర్భాల్లోంచి
జీవన్మరణ సమస్యలతో కొట్టుమిట్టాడుతోంది!

నేరం చేతులు కట్టుకొని
నలుదిశలా నడిచే చరిత్ర మనది!
ఉత్పత్తి శక్తుల రెక్కల కష్టంతో చిగురుతొడిగిన
ఆర్ధిక వ్యవస్థ మూలాల బతుకు జాడ ఇది!

శ్రీశ్రీ శేషేంద్ర శివసాగర్‌ చెరబండరాజు శివారెడ్డి
ఎర్రబావుటాల కవితాక్షేత్రంలో
పురివిప్పి మొలకెత్తి గూడుకట్టిన జిజ్ఞాశువులు ఎన్నెన్నో!

మాట గొంతు విప్పితే
తూటాల చప్పుళ్ళతో తెల్లారే
గూడెం తండాల్లోని విధ్వంసం
అనాది ముఖచిత్రంగా కవిత్వం కళ్ళకి కడుతుంది!
ఒక్క సిరాచుక్క మరక చాలు
అదృశ్యమైపోయిన బతుకుల పీడకలల్లో
ఆరనిజ్యోతిగా అక్షరం వెలుగుతుంది!