వంకిరెడ్డి రెడ్డెప్పరెడ్డి
94400 44922
అనంతపురం జిల్లా, కదిరి. ఊరి పేరు వినగానే గుర్తొచ్చేవి ఖాద్రి నరసింహస్వామి గుడి, వేమన పుట్టిన కటారుపల్లి, మేక మార్కు బీడీలు, విస్తారంగా విత్తే వేరుశెనగ, తెలుగు భాషకు సవితి అనిపించే తురక తెలుగు. ఇరుకు వీధులు. వీధుల్ని అడ్డదిడ్డంగా కలిపే సందుగొందులు, ఆ ఇరుకు వీధుల్లోనే కార్లు, బస్సులు, లారీలు, ఆటోలు, మోటార్‌ సైకిళ్ళు, బండ్లు, మనుషులు, ఆవులు, ఎద్దులు, గాడిదలు, గుర్రాలు. సిగరెట్టు పీకలు, బీడీ ముక్కలు, పేడ లద్దెలు, ఆయిల్‌ మరకలు, అరటి తొక్కలు, పేకముక్కలు, గోళీ గుండ్లు, కమ్మర్‌ కట్లు, సమోసాలు, చెకోడీలు అమ్మేవారి అరుపులు. చాలవన్నట్లు పిల్లలూదే పీపీలు, 'చెప్పల్సే మార్‌ రే సాలేకు', 'తేరి మాకీ' అరుపులు, 'బాగున్నావా అక్కా? మామ బాగున్నాడా'? పలకరింపులు. గోళీలాటలు... జీవన రంగులు వెదజల్లే పేదరికానికి అడ్రస్‌ లాంటి టౌను.
ఆ టౌనుకు నేడు కొత్త జీవం వచ్చినట్లైంది.
'కాలేజ్‌ డేస్‌' సినిమా శతదినోత్సవ వేడుక జరుపుకుంటుం డమే కారణం. సంగం థియేటర్‌ లోపల బయటా ఇసుకేస్తే ఒకటో రెండు రేణువులు మాత్రమే నేల రాలేంత జనం. అయినా ఈ సినిమా హీరోను చూస్తున్న జనంలో అరుపులు కేకలు లేవు. ఉద్వేగం ఉద్రేకం ఉన్మాదం లేవు. తమలో ఒకడ్ని చూస్తున్న ఆనందం.
థియేటరు గోడలపైనుంచి కిందవరకు హౌరుజల్లు చినుకుల్లా, తెరిపి లేకుండా, ధారధారలుగా కదిరి మల్లెలమాలలు వేలాడుతున్నాయి. థియేటర్‌ 'మల్లెపూల తేరు'లా ఉంది. చుట్టూ కిలోమీటర్‌ మేర 'కదిరి మల్లెల తెమ్మెర' విస్తరించింది. బెంగ ళూరు, చెన్నై మార్కెట్లకు వెళ్ళే పూలు ఈరోజు థియేటర్‌ అలంకరణకై వాడారు. కదిరిమల్లెలు పండించే రైతులు 'కాలేజ్‌ డేస్‌' సినిమాపై మక్కువతో మాలలు కట్టి ఉచితంగా అందించారు.
'కాలేజ్‌ డేస్‌' అన్ని రకాల ప్రేక్షకులను ఆకట్టుకున్న సినిమా. ఇందులో హీరో హీరోయిన్లు నిరుద్యోగులు. ఆ నిరుద్యోగుల ఉద్యోగాన్వేషణే సినిమా కథ. నిరుద్యోగ యువత ఏయే అంశా లపై దష్టి పెట్టాలో, కెరీర్‌ మొదటి అడుగులెలా వేయాలో, ఆ అడుగులేయటంలో ఎలాంటి తప్పులు జరిగే అవకాశముందో, తప్పులు జరగకుండా ఎలాంటి శ్రద్ధ తీసుకోవాలో, కెరీరుకు సంబంధించి సలహాలెక్కడ తీసుకోవాలో, అందిన సలహాలనెలా వడబోసి వాడుకోవాలో, కెరీరును సంతప్తికరంగా ఎలా మలుచు కోవాలో, దేన్నయినా సాధించగలమనే మానసిక స్థైర్యమెలా పొందాలో సినిమాలో నిశితంగా చూపించారు. కెరీరులో నిచ్చెనలెక్కడ ఉంటాయో, వానిని అందుకోవడమెలాగో, పాములెక్కడుంటాయో, వాని కోరలకు అందకుండా తప్పించు కోవడమెలాగో లాంటి పాఠాలనూ చూపారు. ఈ సినిమా 'మాకోసం' అని యువత చూశారు. 'మన పిల్లల కోసమట' అని తల్లిదండ్రులు చూశారు. 'సమాజం గురించి ఆలోచించిన సినిమా' అంటూ విమర్శకులు, 'యువతకు జీవితానుభవాల పాఠం' అని మేధావులు పొగిడారు.
హీరో అభిజ్ఞ ఐదేళ్ళుగా సినిమా ఇండిస్టీలో ఉన్నాడు. అతడి ఐదు సినిమాలు రిలీజయ్యాయి. అన్నీ సాధారణ హిట్లే. ప్రజల సమస్యలపై, వాని పరిష్కారానికై స్పష్టమైన విధానాలు చూపే సినిమాల్లో నటించడం అతడి ప్రత్యేకత. కథానాయకుడిగా నటించ డంతోపాటు ఆ సినిమాలకు కథ, కథనం అతఃడే సమకూర్చడం విశేషం. మొదటి సినిమాలో వ్యవసాయం, రెండో దానిలో అంటరానితనం, మూడోది లంచగొండితనం, నాలుగోది రాజకీయ నాయకత్వంపై వచ్చాయి. ఇప్పుడు ఈ సినిమా సూపర్‌ హిట్‌, ఓ సంచలనం.
అఅఅ
కదిరి జెండామాను సందులో నిత్యం కళకళలాడే ఇల్లు బుడేన్‌ సాబు, జమీలా బేగంలది. తమ ముందు తరాలకు కూడుపెట్టిన బీడీలు చుట్టే ఉపాధినే ఆ జంట కూడా నమ్ము కున్నారు. వారి సంతానం ఏడు మంది మగపిల్లలే. పదేళ్ళ వయసు నుంచే ఆరుమంది పిల్లలకు బీడీలు చుట్టడం అలవాటు చేశారు. మండీనుంచి తూంకాకు తేవడం, నానబెట్టడం, దీర్ఘ చతురస్రాన్ని ఒకవైపు లాగినట్లుగా ఆకు కత్తిరించడం, ఆకు వెనక ఈనె జువరడం, పొగాకు తేవడం, తడపడం, సన్నగా కత్తరించ డం, బీడీలు చుట్టడం, కట్టలు కట్టడం, కట్టలను బండిళ్ళుగా పేర్చడం, బండిళ్ళు మండీలో అప్పగించడం లాంటి పనులు ఎవరికి వారుగా చేసుకుపోతుంటారు. గోడకానుకుని కూర్చుని బీడీలు చుడుతూ ఊగడం కొడుకులకు తల్లిదండ్రులనుంచి అల వడింది. ఊగి ఊగి వీపు సైజు మేర గోడకు సున్నం మాసి పోయి ఉంటుంది. ఎవరికి వారు తమ తమ సీట్లలో కూర్చో వడానికి అదే గుర్తు.
ఆర్థికంగా పర్వాలేదనిపించుకున్నాక బీడీలు చుట్టేందుకు పదిమంది కూలీలను పెట్టుకున్నారు. కొడుకులు, కూలీలనే తేడా లేకుండా అందరూ ఒకే కొట్టంలో కూర్చుని బీడీలు చుట్టేవారు. కొన్నాళ్ళకు ఇంకో పెద్దకొట్టం కట్టుకున్నారు. తూంకాకు, పొగాకు కత్తరించడం పాతకొట్టంలో చేసేవారు. కొత్తకొట్టంలో బీడీలు చుట్టేందుకు మరో యాభైమంది కూలీలు జమయ్యారు. కూలీలకు తురకం రాదు. ఇంట్లోవాళ్లకు తెలుగు అరకొర వచ్చు. దాంతో కూలీలకు కూడ అర్థమయ్యే తురక తెలుగు మాట్లాడడం ఇంట్లో అలవాటయ్యింది.
పదేళ్ళలో కుటుంబం స్వంతంగా 'ముంగిస మార్కు బీడీ' కంపనీ పెట్టింది. కంపెనీ బీడీలు తెలంగాణా, దక్షిణ కర్ణాటక, దక్షిణ తమిళనాడు ప్రాంతాల్లో బాగా అమ్ముడవుతుండటంతో, 'ఏ మట్టిలో రాలిన విత్తు ఆ మట్టిలోనే మానయినట్లు', వచ్చిన లాభాలతో కోయంబత్తూరు, షిమోగా, హైదరాబాదు శివార్లలో రియల్‌ ఎస్టేట్‌ భూములు కొన్నారు.
అఅఅ
సినిమా నటులంటే అభిమానం ఈ ఆరుమంది పిల్లల రక్తంలో జీర్ణించుకుపోయింది. పెద్దపిల్లలు ముగ్గురు ఓ హీరో అభిమానులు, చిన్నవాళ్ళు ముగ్గురూ మరో హీరో అభిమానులు. నాలుగోవాడికి సినిమా హీరోల పిచ్చి లేదు. పుస్తకాల పిచ్చి మాత్రమే. అది గమనించిన తల్లిదండ్రులు అతడిని బెంగుళూరులో ఉంచి చదివిస్తున్నారు.
ఒకప్పుడు శతదినోత్సవం జరుపుకోవడం మంచి సినిమాకు ప్రామాణికమైతే, ఇప్పుడు వెయ్యి థియేటర్లలో రిలీజ్‌ చేయడం పెద్ద సినిమాకు ప్రామాణికం. ఆ శుక్రవారం ముగ్గురు పెద్ద కొడుకుల అభిమాన హీరో సినిమా రిలీజ్‌ కానుంది. ఆ హీరోకు పంపిణీ రంగంలో 'బ్లాక్‌ మార్కెట్‌ హీరో' అనే పేరుంది. ఊర్లో ఉండే ఐదు థియేటర్లలోనూ అదే సినిమా. అనుమతించిన నాలుగు షోలు కాకుండా రోజుకు ఎనిమిది షోలు ఆడిస్తారు. బెంచి నుంచి బాల్కనీ వరకు ఒకే రేటు. వెయ్యి రూపాయల లెక్కన టికెట్లు అమ్ముతారు. గురువారం మధ్యాహ్నమే ముగ్గురు పెద్ద కొడుకులు బీడీలు చుట్టడం ఆపేశారు. కోవిడ్‌ పుణ్యమాని ఇంటికొచ్చిన నాలుగో కొడుకును కూడా అన్నలు సినిమాకు తీసికెళ్లారు. తమ్ముడు బెంగుళూరులో చదువుతున్నాడని చెప్పు కోవడం అన్నలకు ఆనందం. అందుకే సినిమాలకు, గోళీలతోపుకు అతడిని తీసుకెళతారు.
తనను సినిమాకు తీసికెళ్తే ఎదురయ్యే సమస్య చిత్రమైంది. సినిమాలో హీరోయిన్‌ బాగుందా? అందాలు ఆరబోసిందా? అశ్లీల డాన్సుందా? ముద్దు సీన్లున్నాయా? డబల్‌ మీనింగ్‌ డైలాగు లున్నాయా? రొడ్దకొట్టుడు ఉందా? అని ఆస్వాదించడు. సినిమా లో కథ ఉందా? కథ మనుషులకు సంబంధించిందా? అంటూ ఆరాలు తీస్తాడు. తత్త్వం తెలిసి కూడా అతడిని వెంటేస్కోని అన్నలు థియేటర్ల చుట్టూ తిరిగారు. ఇలా నలుగురు కొడుకులు మిడ్నైట్‌ షో చూసి వచ్చారు. మరుసటిరోజు సినిమాకు వెళ్ళని వాళ్ళు ఊగుతూ బీడీలు చుడితే, వీళ్ళు తూగుతూ చుట్టారు.
ఎవరూ అడగకనే రెండో కొడుకు షమీం బషీర్‌ ''సిన్మా నూర్దినాల్‌ హాడ్తుంది.'' సినిమాపై రివ్యూ చెప్పాడు. సినిమాకు పోయినవాళ్ళు కథ చెప్పడం రివాజు. బాగుందంటే బీడీ చుట్టే కూలీలతో సహా మిగతా కుటుంబ సభ్యులు ఆ సినిమాకు పోతారు, లేదంటే పోరు.
నాలుగో కొడుకు అహ్మద్‌ షబ్బీర్‌ కథ చెపుతూ, ''బేవార్స్‌ సిన్మా. పద్రోజులు గుడ్కా హాడ్దు. సిన్మా బాగ్లేదని తెలుస్కోకనే జనాల్‌ చూసెయ్యాలని హన్ని హాల్లలో రిలీజ్‌ చేస్నాడ్‌, దొంగ కొడ్కు. సిన్మా మొదట్లో కాలేజ్లో హీరోయిన్కి ఎవడో రాగింగు చేస్తాడ్‌. హీరోయిన్కి హీరో రక్షిస్తాడ్‌. హప్పటినుంచి హీరో చుట్టూ తిర్గుతూ తనను ఇష్క్‌ చెయ్మని హీరోయిన్‌ రచ్చ చేస్తుంటాద్‌. హీరోకు ఇష్క్‌ హాలోచన్‌ హుండ్దు. ఆయప్ప తన బెహన్‌ పెళ్లి చెయ్యాలని తకరార్‌ పడ్తుంటాడ్‌. హీరోయిన్కి అబ్బా డ్రగ్స్‌ వ్యాపారం చేసి కోటీశ్వరుడ్‌ అయిఉంటాడ్‌. నాది కూతుర్కి కూట్కి గత్లేనోడ్‌ ఇష్క్‌ చేస్తాడ్‌? హనే కక్షతో కోటీశ్వరుడ్‌ హీరోయిన్కి అబ్బా హీరోపై దొంగ కేస్‌ పెట్టిస్తాడ్‌, జైల్లో ఏపిస్తాడ్‌. హీరో జైల్నుంచి తప్పించుకుంటాడ్‌. విలన్‌ హింటికెళ్ళి నీది కూతుర్కి నేన్‌ ఇప్పటిదాక ఇష్క్‌ చెయ్లేద్‌. నీది డ్రగ్స్‌ య్యాపారమ్‌ మానేస్తే ఇష్క్‌ చేయనంటాడ్‌. విలన్‌ హంద్కు ఒప్పుకోడ్‌. హయితే నీది బేటీకి ఇష్క్‌ చేస్తా హని చాలెంజ్‌ చేస్తాడ్‌. హప్పుడు హీరో హీరోయిన్లు విదేశాల్లో పాట్లు పాడ్కుంటార్‌. సిన్మా చివరాకర్లో విలన్‌ మన్సుల్‌ యాభైమంద్కి హీరో మస్తుగా కొట్టేస్తాడ్‌. తనో అండిర్గౌండ్లో హున్న పోలీస్‌ హాఫీసర్‌ హని హబ్బుడు చెప్తాడ్‌ హీరో. డ్రగ్స్‌ య్యాపారం గురించి కనుక్కోవడానికే స్పెషల్గా హపాయింట్‌ చేశార్‌ హని చెప్తాడ్‌. హీరోను తుపాక్తో కాలుస్తాడ్‌ విలన్‌. గుండెకు గుండు తగ్లినా హిరో బత్కతాడ్‌. మీది అబ్బా డ్రగ్స్‌ వ్యాపారం చేస్తాడని, ఆ డ్రగ్స్‌ తినే మీది భయ్యా చచ్చాడని హీరో హీరోయిన్కు చెప్తాడ్‌. హీరోయిన్కి అమ్మా ఆ మాట్విని తుపాక్తో మొగుడ్కి కాలుస్తుంది. ఆ దెబ్బకు విలన్‌ సఫా అయ్పోతూ, 'మాది బిడ్డకు బాగా చూస్కో' హని హీరోయిన్‌ చేత్ని హీరో చేత్లో పెడ్తాడ్‌. మొగుడ్కి చంపిన బాధ్లో హీరోయిన్‌ అమ్మా కూడా తుపాక్తో కాల్చుకుని సఫా హయిపోతుంద్‌. హింత పన్కిమాల్న సిన్మా జూసేకి నాల్గువేల్‌ దుంపనాశనమ్‌.'' అంటూ ముగించాడు.
కథ వింటున్న తల్లిదండ్రులు ఒకరి ముఖాలొకరు చూసు కున్నారు. పెద్ద కొడుకు ఇంటి జమాఖర్చులు చూస్తుంటాడు. గోళీలాటలో ఐదు రూపాయల కోసం రక్తగాయాలయ్యేటట్లుగా కొట్టుకునే కొడుకులు, రోజంతా బీడీలు చుడితేగానీ రెండొందలు సంపాదించలేని కొడుకులు, సినిమా చూడ్డానికి ఒక్కొక్కరికి వెయ్యి లెక్కన నాలుగు వేలు నాశనం చేయడమేంటి? 'రెండున్నర గంటల వినోదానికి ఐదు రోజుల కూలి డబ్బులు దండుకునే హీరోను మించిన దోపిడీదారెవరు?' అభిమానమనే పిచ్చి పట్టించిన హీరోలకు తమ కుటుంబం ఇంకా ఎన్ని వేల రూపాయలు ఋణపడి ఉందో? అనుకుని నిట్టూర్చారు.
మధ్యవాడితో కలిపి చిన్న కొడుకులు నలుగురు ఈ సారి మరో హీరో సినిమాకు పోయారు. పోయిన నెలలాగే ఈ సారి కూడా సినిమాకు ఖర్చుపెట్టారు. తెల్లవారుజాము షోకు పోయి వచ్చిన ఐదో కొడుకు సినిమా గురించి చెప్తూ, ''హబ్బో హేమ్‌ సిన్మా తీస్నాడ్‌? హిదీ సిన్మా నూర్దినాలు హాడ్తుంది, ఖాయం.'' అంటూ రివ్యూ చెప్పాడు.
కథ నాలుగో కొడుకే చెప్పాడు. ''మొన్న చూసిన్దాన్కంటే ముఠాల్‌ సిన్మా హిది. విలన్‌ కెమికల్‌ ఫ్యాక్టరీల్‌ నడిపే రాజ్కీయ నాయ్కుడు, ప్రధాన్మంత్రి కావాలన్కుంటాడు. పద్వికి పోటీ పడ్తారని తన్కంటే సీనియర్లయిన ముగ్రు తన పార్టీ ఎంపీలకు సఫా చేయిస్తాడ్‌. వోళ్ళు దాసిపెట్న దొంగ సొత్తు ఐదు లచ్చల కోట్లు కొట్కోని పోతాడ్‌. హది డబ్బు ఎంపీలకు హిచ్చి ప్రధాన్మంత్రి హవ్తాడ్‌. హీరోయిన్‌ ఈ ప్రధాన్మంత్రి కూత్రు. హీరో కాలేజ్కి సైకిల్పై పోతాడ్‌. హీరోయిన్‌ హిమాన్మంత కార్లో వస్తుంది. హీరోయిన్‌ హందానికి హీరో పడ్పోతాడ్‌. హీరోయిన్‌ హీరోను చూసి, 'నువ్వు నాకి చెప్పుల్‌ విల్వ్‌ చెయ్వు' హంటుంది. హయితే హౌటళ్ళలో మిగ్లిపోయిన ఖానా హీరో బిక్షగాళ్ళకు తెచ్చి పెడ్తాడని తెల్సి హీరోయిన్‌ హతడ్కి ఇష్క్‌ చేస్తుంది. హీరో హీరోయిన్లు అమెర్కాలో రెండు పాట్లు పాడ్కుంటారు. అమెర్కాలో ఒగ న్యూస్పేపర్‌ యితడు ప్రధాన్మంత్రి హెలా హయ్యింది బైట్పెడ్తుంది. హప్డు అమెర్కాలోనే హున్న హీరోకు తను ప్రేమించే అమ్మాయే ప్రధానమంత్రి కూత్రని తెలుస్తాద్‌. హీరో ఇండియాకు వచ్చి, దేశ ప్రజల్కి మోసం జర్గిందని టీవీలో మాట్లాడ్తాడ్‌. ప్రధాన్మంత్రి చేసిన నేరాల్పై కేస్‌ వేస్తాడ్‌. కోర్టులో కేసు రుజ్వు కాద్‌. ప్రధాన్మంత్రి కెమికల్‌ ఫ్యాక్టరీల్లోంచి వ్యర్థాల్‌ ప్రజల్తాగే మంచినీళ్ళ చెర్వుల్లో పడ్తుంటారు. ఫ్యాక్టరీలపై హింకో కేసు వేస్తాడ్‌ హీరో. దాన్లో కూడ ఓడ్పోతాడ్‌. విలన్‌ హీరో మీద్కి గూండాల్కు పంపుతాడ్‌. అంతే హీరో ఒక్కడే నూర్మంది ప్రధాన్మంత్రి పెట్టిన గూండాల్కి దంచి కొడ్తాడ్‌. హిద్దరు విలన్‌ గూండాల్‌ ఒకేసారి రెండుపక్కల్‌ నుంచి హీరోకు కడుప్లో, వీప్లో పొడుస్తార్‌. హీరో గాయాల్కు మట్టి పూస్కోని, చొక్కా చింపి గాయాన్కి కట్కోని ప్రధాన్మంత్రి పెట్టిన గూండాల్కు సఫా చేస్తాడ్‌. హక్కడ రాళ్ళు, కట్టెలు, కత్తులు హున్నా హీరో చేతుల్తోనే పోరాడ్తాడ్‌. నేర్గా ప్రధాన్మంత్రి కూడా పైటింగ్‌ చేస్తాడ్‌. హీరోయిన్కి అమ్మా హీరోను తుపాక్తో కాల్చేకి చూస్తుంద్‌. హీరోయిన్‌ హడ్డగిస్తుంద్‌. అమ్మాకూతుర్కి మధ్య జర్గిన తోప్లాటాలో గన్‌ పేలి హీరోయిన్‌ అమ్మాకి బులెట్‌ తగుల్తుంద్‌. హాసుపత్రిలో చేర్చిన హీరోయిన్‌ తల్లికి రకతం హవసరమొస్తుంద్‌. హా గ్రూప్‌ రకతం హెక్డా దొర్కద్‌. ఎవరో తెలీక్నే హీరోకి అమ్మా హీరోయిన్కి అమ్మాకు రకతం హిస్తాద్‌. అంతే హీరోయిన్కి అబ్బా మార్పోతాడ్‌. ప్రధానమంత్రి పద్వికి రాజీనామా చేస్తాడ్‌. హీరో హీరోయిన్లకు పెండ్లి జర్పతాడ్‌.
ప్రధాన్మంత్రి సెక్యూరిటీ ఏమయ్యిందో? ప్రధాన్మంత్రికి కొట్టినా పోలీసుల్‌, కోర్ట్లు, లాయర్లు కన్పడ్రు. హీరో దేశం జెండాకి నమస్కారం పెడ్తాడ్‌, 'నా జన్మభూమి ఎంత గొప్ప దేశం' హని పాట పాడ్తాడ్‌. దేశ్భక్తి హంటే వివరిస్తాడ్‌. సిన్మా హయ్పోతుంది. ప్రధాన్మంత్రికి పద్వినుంచి దించేకి హెలాంటి వాడో ప్రజల్కు తెల్యజెప్పి, హతడ్జేసిన తప్పుల్కి జనాల్లో ప్రచారమ్జేసి, ప్రచారాన్కి జనాల్‌ నమ్మి, ఎన్నికల్లో హతడ్కి ఓడించారని కథ హుండద్‌. ముఠాల్‌ సిన్మా, థూ. దీన్కి కూడా వెయ్యి లెక్కన టిక్కెట్లు కొన్నామ్‌,'' అంటూ ఆ సిన్మా గురించి ముగించాడు.
''అన్నీ సిన్మాలు హిలాంటి ముఠాల్‌ సిన్మాలే. హే పెద్ద హీరో సిన్మా జూస్నా ఒగ్టే. జనాల్‌ హేమ్‌ సిన్మాల్‌ చూడాలో హీరోలే హల్వాట్‌ చేస్నార్‌. చూసేవాళ్ళ ఆలోచనల్లోకి హీరో దూర్పోతాడ్‌. డైలాగ్లతో ఉద్వేగం కల్గిస్తాడ్‌. రొడ్డకొట్టుడ్తో రకతం ఉడికేట్టు చేసి, ప్రజల్కు పిచ్చోళ్ళకు చేస్తాడ్‌. సిన్మా జర్గేంత సేపు జనాల్‌ కూడా పిచ్చోళ్ళ మాద్రిగా చేస్తార్‌. డబల్‌ మీనింగ్‌ డైలాగ్లొచ్చినప్డు ఈల్లు, డాన్సులోస్తే సీట్ల సందుల్లోనే డాన్సుల్‌, ఫైట్లోచ్చినప్డు డిషుం డిషుం అంటూ చేతులు ఊప్డాలు.. అంతా రోత్రోత చేస్తార్‌. థియేటర్‌ బయట్కొచ్చి కూడా ఈల్లు, కేక్లు హేస్తార్‌.''
''సినిమా అయిపోయిన తర్వాత్కూడా ఉద్వేగం, ఉద్రేకం హలాగే కొనసాగే ప్రమాదమ్‌ హుంటుంద్‌. పుత్తడ్‌ లాంటి మన్సులకు ఇత్తడ్‌ మాద్రిగా చేస్తార్‌. హింకా మాదర్చేద్‌ మాట హేమ్టంటే హిదీ హీరోలు వయసు పెర్గాక, సిన్మాల్లో పనికిరామేమో అనే అనుమానంతో, వీళ్ళపై జనాల్కి హుండే ఉద్వేగమ్‌,
ఉద్రేకమ్‌, అభిమానమ్‌ ఉపయోగించుకుని ఓట్లు రాబట్టుకోవచ్చని రాజకీయాల్లోకి కూడా వస్తార్‌.''
అఅఅ
ప్రతిసారి మౌనంగా సినిమా కథలు వింటుంటాడు దిన కూలీ నరసింహా. చదువుకున్నోడయినా కడుపుకు జరక్క బీడీ చుట్టే పనికి వీళ్ళ కంపనీకే వస్తాడు. కూలీలలో ఒక్క నరసింహాతో మాత్రమే కలివిడిగా మాట్లాడతాడు నాలుగో కొడుకు అహ్మద్‌. నరసింహా మాట్లాడుతూ,''సినిమాల్లో జనాలకు పనికొచ్చే కథ ఉండదని, జనాన్ని మోసం చేసే హీరోయిజం, ఉద్వేగం,
ఉద్రేకం, ఉన్మాదం మాత్రమే ఉంటాయని, సినిమాలో ఉండేవి, ఉండాల్సినవి అన్ని విషయాలు చెప్తావు కదా? నువ్వే సినిమాల్లోకి పోవచ్చుగా!'' అన్నాడు.
''మనలాంటోల్లు సిన్మాల్లోకి పోవాలంటే హిప్డు హుండే పెద్ద హీరోల కుటుంబాల్లో పుట్టిండాల్‌. పెద్ద హీరోల హిళ్ళలో హుండే బిడ్డల్కు హీరోల్ను హవనిస్తార్గానీ మనల్కి హవనియ్యర్‌? 'హా ఇళ్ళ కణికిరాయైన ఖరీదైన వజ్రమని భ్రమింపజేస్తార్‌, మన్లాం టోళ్ళ ఇళ్ళలో ఖరీదైన వజ్రమున్న కణికిరాయేనని నమ్మిస్తార్‌'. వాళ్ళు కాకుండా మరెవరైనా హీరో కావాలి హంటే పెద్ద పెద్ద కుటుంబాల నుంచి వచ్చిన్డాల్‌. కోట్లుకోట్లుగా ఎద్రు డబ్బులిచ్చి సిన్మాలో హీరోగా చెయ్యాల్‌. హయినా అలా వెళ్ళినా బత్కనీర్‌. మన్లాంటోళ్ళది ఒకటి సిన్మా హిట్‌ హయినా నల్పేస్తార్‌. వీడు తమ బిడ్డల్కు హడ్డం వస్తాడని సినిమాలు ప్లాప్‌ చేయిస్తార్‌. 'వాళ్ళ బిడ్డల్కోసం నిచ్చెన్లేయడంతో హాగర్‌, యిత్రుల బిడ్డల్కు పాముల్నో ట్లోకి తోసేస్తార్‌'. హంతగా మాన్లాంటోళ్ళకు సిన్మా పిచ్చి పడ్తే హీరో పక్క కామ్డీ చెయ్యాల్‌, హీరోయిన్తో తన్నుల్తినే హాక్టింగ్‌ చెయ్యాల్‌. లేదా విలన్‌ పక్కన గుంప్లో గూండా మాద్రిగా చెయ్యాల్‌.'' అహ్మద్‌ జవాబిచ్చాడు.
''జనాలు చూస్తుంటే సినిమా ప్లాఫ్‌ చేయించడం ఎలా వీలవు తుంది?'' నరసింహ అనుమానాలు పెరిగినాయి.
''సుల్భంగా చేస్తార్‌. థియేటర్లూ హన్ని వాళ్ళవే, వాళ్ళ మిత్రుల్వే. జనాల్‌ చూస్తున్నా కొత్త సిన్మా రిలీజ్‌ ఉందని దీన్కి హెత్తి వేయిస్తార్‌. లేదు హంటే ఎద్రు థియేటర్లో పెద్ద హీరో సిన్మా రిలీజ్‌ చేయిస్తార్‌. సిన్మా బాగ్లేదని లోపల్లోపల్‌ ప్రచారం చేయిస్తార్‌. కలెక్షన్‌ లేద్‌ హని తక్కువ డబ్లు నిర్మాత్కు హిస్తార్‌. హదే వాళ్ళ బిడ్డల్కి హయితే ఎలాగైనా సాయం చేస్తార్‌. ఇతరుల్దైతే నాశ్నం చేస్తార్‌. వాళ్ళ బిడ్డల్కి సిన్మాకి 'హౌస్ఫుల్‌ కల్లెక్షన్లతో నడుస్తున్న' హని రాయించుకుంటార్‌. పత్రికల్లో 'పెద్ద పెద్ద రేటింగ్లు' హిప్పించుకుంటార్‌. ప్రేక్షకుల్ని సిన్మాకు రప్పించు కుంటార్‌.''
''కొత్త హీరోల ఒకట్రొండు సిన్మాలు బాగా హాడ్తే, హతడి సిన్మా రిలీజ్‌ డేట్కు పెద్ద హీరోల సిన్మాలు రిలీజ్‌ హయ్యేటట్లు ప్రణాల్కలు వేస్తార్‌. పెద్ద హీరోల సిన్మాల్‌ ముందు కొత్త హీరోల సిన్మాల్‌ నల్గిపోతారు. మనలాంటోళ్ళు సిన్మాల్లోకి పొరు హీరో కావాలన్కుంటే హంతే. 'ఆనెల్‌ తీస్కునేకి హాస్పిటల్కు పొతే కిడ్నీల్‌ కొట్టేసినట్లు', నిండా గుండ్‌ గొర్గేస్తార్‌.''
అహ్మద్‌ జవాబుతో సంతప్తి చెందని నరసింహా ప్రశ్న కొన సాగించాడు. ''వాళ్ల బిడ్డల్నే హీరోలు చేయడం ఎలా కుదుర్తుంది? అందంగా ఉండొద్దా? ఆక్టింగ్‌ రావొద్దా? డాన్సులు రావొద్దా, ఫైటింగ్‌ రావొద్దా?'' అని.
''వాళ్ళ బిడ్డల్కు అందంగా లేకపోయ్నా జనాల్కు నచ్చేట్లుగా హాక్టింగ్‌, డాన్సుల్‌, ఫైట్లు నేర్పిస్తార్‌. హింకా హవసరం హైతే హండచెక్కించి, గెనంపెట్టించి, మడి నాటించి హీరోల్ను చేస్తార్‌.''
''సేద్యానికి, సినిమాకు ఏమిటి సంబంధం?'' నరసింహా ప్రశ్న అయిపోలేదన్నట్లు ముఖం పెట్టాడు.
''ముఖమో ముక్కో బాగ్లేదన్కో, హండ చెక్కినట్లు ప్లాస్టిక్‌ సర్జరీ చేయిస్తార్‌. పళ్ళు సరిగ్గా లేవన్కో, గెనం పెట్టినట్లు పళ్ళు కట్టిస్తార్‌. బట్ట తలన్కో, మడ్నాటినట్టు జుట్టు నాటిస్తార్‌.'' అహ్మద్‌ జవాబు చెప్పాడు.
''నీకు తెలుగు వచ్చుకదా, తురకతెలుగు ఎందుకు మాట్లాడ తావు?'' చివరి ప్రశ్న వేశాడు నరసింహా.
''నా మాట మీరంతా అర్థం చేసుకోవాలిగా.. అందుకే మీరు మాట్లాడే బాషలో మాట్లాడతాను.'' అహ్మద్‌ ఇచ్చిన ఈ జవాబుతో తన వద్ద ప్రశ్నలు ముగిసినట్టు నరసింహా ముఖం పెట్టాడు.
అఅఅ
వ్యాపారం విస్తరించడంతో బుడేన్‌ సాబ్‌ కుటుంబం బెంగ ళూరుకు తరలిపోయింది. తమతోపాటు ఎవరు తమతో వస్తామంటే వారికి బెంగుళూరులో తమ బీడీ కంపనీలోనే పని కల్పించారు. పదేళ్ళ సమయం గడిచిపోయింది.
పదేళ్ళ క్రితం నరసింహా అహ్మదును అడిగిన ప్రశ్న ''నువ్వు సినిమాల్లోకి పోవచ్చుగా?'' బుడెన్‌ సాబ్‌ దంపతుల మనసులో అలాగే ఉండిపోయింది. 'ఒక్క కొడుకునైన సినిమాల్లో హీరోగా ఎందుకు చెయ్యకూడదు?' అనే ఆలోచన తపన వారిలో స్థిరపడి పోయింది. హిందీ సినిమాల్లో పెద్ద హీరోల్లో చాలామంది ముస్లిములే కదా? అదే విషయం ఇంట్లో చర్చకు పెట్టారు. ముందుగా ఏ కొడుకైతే హీరోగా సరిపోతారనే చర్చ వచ్చింది. తల్లి పోలికలున్న నాల్గో కొడుకు హీరోగా సరిపోతాడనుకున్నారు. అతడినే హీరోగా చేయాలనే అంశంలో నరసింహా పాత్ర కూడా ఉంది. ''ఖంగుమనే నీ వాయిస్‌, అచ్చమైన నీ తెలుగు,
ఉచ్చారణలో స్పష్టత, మంచి మేధస్సు సినిమా హీరోల కంటే గొప్పగా ఉంటాయి. కొరుక్కు తినాలనిపించే నీ ముఖం, కండలు తిరిగిన శరీరం ఇంకా బాగుంటాయి. నీ పేరు మార్చుకుంటే సరిపోతుంది.'' అంటూ ఊదరగొట్టాడు.
''డబ్లు హిషయం హాలోచించద్దు. హైదరాబాదు, కోయం బత్తూరు, షిమోగాలో ఉండే హాస్తులు హమ్మేస్తాం'' అన్నారు ఇంట్లో వాళ్ళు.
''సినిమా పరిస్థితులు మీకు తెలియవు,'' నాలుగో కొడుకు విడమర్చి చెప్పాడు. 'వండే బోకులుండే ప్రతివాడు నిత్యాన్నదానం చేస్తానని ప్రతిజ్ఞ చేయడం తప్పు' అంటూ వివరించాడు.
కుటుంబ సభ్యులు 'తాము పట్టిన కుందేటికి ఒకే కాలు' అన్నారు.
అఅఅ
'కాలేజ్‌ డేస్‌' సినిమా విజయోత్సవాన్ని మిగతా సినిమా విజయోత్సవాల్లాగా హీరో చేతులూపడమేనన్నట్లు ముగించలేదు. తెరవైపు స్టేజి ఏర్పాటుచేసి పదిమంది కూర్చోవడానికి ఏర్పాట్లు చేశారు. హీరో హీరోయిన్లతో పాటు నిర్మాత, దర్శకుడు, థియేటర్‌ యజమాని కూర్చున్నారు. మొదట థియేటర్‌ యజమాని అందరికి స్వాగతం పలికాడు.
''హీరో అభిజ్ఞగారి ఆలోచన చెప్పాలంటే సినిమా అంటే నిర్మాతల కోసమో, హీరో కోసమో కాదు. సినిమా ప్రజల కోసం, ప్రజా సమస్యలకు పరిష్కారం చూపడం కోసం అంటాడు. హీరోను మానావాతీత వ్యక్తిగా ఎందుకు చూపాలి? వందమందిని మట్టి కరిపించే శక్తిగా చూపడానికి హీరో పాశుపతాస్త్రమా? ఒక్క దెబ్బ వేయగానే వందమంది నేలకొరగడానికి యమకింకరు డా? హీరోయిన్తో కలిసి డాన్స్‌ చేయడానికి తిక్కలోడా? అశ్లీల డాన్స్‌ చేయడానికి ఊర్వశి, మేనక, తిలోత్తమ భూలోకానికి వస్తారా? హీరో నోట్నుంచి డైలాగులు రాగానే చూస్తున్న ప్రేక్షకులు తలలూపి వినడానికి ఆయన చెప్పెదేమైన భగవద్ఘీతనా? పోనీ చెప్పింది భగవంతుడా? సామాన్యులు కడుపులు కట్టుకుని నాలుగు రూకలు హీరోల కు ఇస్తున్నప్పుడు, వాళ్ల బాగోగుల కోసమే సినిమా తీయాలంటారు అభిజ్ఞ గారు. వారికి నా మనఃపూర్వక వందనాలు'' అంటూ నిర్మాత ముగించాడు.
దర్శకుడు మైకు అందుకున్నాడు : ''గతంలో 'కళ కళ కోసం కాదు సమాజం కోసం' అనే ధోరణి ఉండేది. సినిమా సమాజ మనోవికాసం కోసమనే చర్చసాగేది. ఇపుడు సినిమా అంటే ప్రేక్షకుల ఉద్వేగాన్ని, ఉన్మాదాన్ని పెంచేదే కాదు రొడ్డకొట్టడాలు, అందాల ఆరబోతలు, అశ్లీల డాన్సులు చూపడానికి మాత్రమే. మాఫియాగా తయారై ప్రేక్షకులను మత్తుమందు లాంటి సినిమా లకే అలవాటు చేశారు. ఆ మార్గం నుంచి వేరుపడి సమాజం కోసం సినిమాలన్నట్లు అభిజ్ఞ గారు పయనించారు. అందులో మమ్మల్ని భాగస్వాముల్ని చేశారు. అందుకు వారికి జీవితమంతా రుణపడి ఉంటాం,'' అంటూ ముగించాడు.
హీరో అభిజ్ఞ మైక్‌ తీసుకున్నాడు. సభలో హౌరు ఆగడానికి రెండు నిముషాలు పట్టింది. తను మాట్లాడడం మొదలెట్టాడు. ''మీరెవరూ నన్ను గుర్తుపట్టకపోవడం ఒకింత ఆశ్యర్యంగా
ఉంది. మీ మధ్య పెరిగాను. నా చిన్నపుడు రోజుకు పదిసార్ల యినా ఈ థియేటర్‌ చుట్టూ తిరిగాను. బయట ఓ పిల్లవాడి పోటోకు దండలు వేశారు, ఆ పిల్లవాడిని గుర్తు పట్టారా?'' ఎవరూ జవాబు చెప్పలేదు. ''ఆ పిల్లవాడు నేనే. పోనీ ఈ ఊర్లో ముంగిస మార్కు బీడీ కంపెనీ ఉండేది తెలుసా?'' థియేటర్‌ మొత్తం తెలుసు తెలుసు అన్నట్లు చేతులూపారు. ''నా పేరు అభిజ్ఞ కాదు, అహ్మద్‌ షబ్బీర్‌. నేను దుబారు హాస్పిటల్‌ ఇండిస్టీలో పేరు మోసిన రాధామాధవ గారి కొడుకును కాదు. ముంగిస మార్కు బీడీ కంపెనీ యజమాని బుడెన్‌ సాబ్‌ కొడుకును. నా మతాన్ని, కులాన్ని, చివరికి నా తల్లిదండ్రుల పేర్లను మార్చుకుని సినిమాల్లో నిలబడ్డాను. నా తల్లిదండ్రులు సంపాదించిన ఆస్తి అమ్ముకుని సినిమాల్లోకొచ్చాను. ముక్కుపుడక కొనడానికి ముప్పేట చైను అమ్ముకున్నట్లయింది నా సినీ ప్రయాణం.''
''మీడియాలో ప్రచారం జరిగినట్లు నేను 'ముంబై స్కూల్‌ అఫ్‌ స్టైలిష్‌ లుకింగు' నుంచి డిప్లొమా పొందలేదు. 'హాంకాంగ్‌ స్కూల్‌ అఫ్‌ డిఫెన్సు లెర్నింగు'లో ఫైటింగు నేర్చుకోలేదు. 'లండన్‌ స్కూల్‌ అఫ్‌ ఆర్టు'లో ఆక్టింగ్‌ చదవ లేదు. ఈ ఊరి పరిస్థితులు, మనుషులు, వారి అగచాట్లు, కడగండ్లు నాకు పాఠాలు. కాకపోతే ముంబైలో ఓ చిన్న ఆక్టింగు స్కూల్లో మాత్రం పాఠాలు నేర్చుకున్నాను.''
''సమాజానికి ఏ రకంగానూ ఉపయోగం లేని సినిమాలు తీయడం, డైలాగు డెలివరీ, రొడ్డకొట్టుడుతో ప్రేక్షకుణ్ణి ఉద్వేగ, ఉద్రేక స్థాయిలోకి తీసికెళ్ళడం, ఆ ఉద్వేగం, ఉద్రేకాలనుఉన్మాద స్థాయికి చేర్చడం లాంటివన్నీ పరిశ్రమలో జరుగుతున్నాయి. 'అంతా మేమే, అంతా మాదే' అనే సంస్కతి ఇండిస్టీలో నెలకొనడంతో ఈ దుస్థితి. నాలుగైదు కుటుంబాల నుంచి హీరోలుండటమే ఈ పరిస్థితి.''
సభలో నాలుగు మూలలా కోలాహలం బయలుదేరింది. ఒక్కో మూల ఒక్కో హీరో అభిమానులు కూర్చోని ఉన్నారు. ఏ గుంపుకాగుంపు ''అభిజ్ఞ డౌన్‌ డౌన్‌'' అనడం మొదలెట్టారు. అందరినీ స్టేజీ వద్దకు రమ్మన్నాడు అభిజ్ఞ. వాళ్ళ కళ్ళలోకి సూటిగా చూశాడు. ''మా హీరోని తప్పు పడుతున్నారు, దూషిస్తున్నారు. క్షమాపణ చెప్పాల్సిందే'' నాలుగు గుంపుల వాళ్ళూ అన్నారు. ''అభిజ్ఞ డౌన్‌ డౌన్‌'' అనడం కొనసాగించారు. అభిజ్ఞ సామాజిక పరిస్థితి అర్థమయ్యాక మరింత ధైర్యం వచ్చింది వాళ్లకు. తను సమాజానికి పనికొచ్చే సినిమాలు చేస్తున్నందుకు ఆనందించాలో, లేక కులం చట్రంలో మిగిలిపోయిన యువతను చూసి సిగ్గు పడాలో అర్థం కాలేదు అతడికి... 'మొగుడు పోయినందుకు ఏడవాలో, విధవ పెన్సనొస్తున్నందుకు నవ్వాలో' అర్థం కానట్టు.
''నాది హీరోలను దూషించేంత వికత మనస్తత్వం కాదు. ఎంతోమంది మేధావులు కలిస్తే తప్ప ఓ సినిమా తయారవదు. అంతమంది మేధావులు కలిసి సమాజానికి పనికొచ్చే సినిమాలు తీయలేరా?'' తీక్షణంగా ఆ గుంపుల వైపు చూశాడు. మాట కొనసాగిస్తూ ''ఆ హీరోలు చూపించే ఉద్వేగం, ఉద్రేకం,
ఉన్మాదం, అశ్లీలం, అంగ ప్రదర్శన, రొడ్డకొట్టుడుపై తుపుక్కున ఉమ్మేయండి.'' అంటూ విసవిసా మీటింగునుంచి వెళ్లిపోయాడు.
''ఘర్షణతో ముగిసిన అభిజ్ఞ సినిమా విజయోత్సవ సభ'' అంటూ మరుసటిరోజు మీడియాలో బానర్‌ హెడ్డింగ్‌ పెట్టారు. ఇతర నటీనటులను అవమానించాడని 'నటీనటుల సంఘం' నుంచి అబిజ్ఞను బహిష్కరించారు. నిర్మాతల సంఘం, పంపిణీ దార్ల సంఘం, థియేటర్ల సంఘం అభిజ్ఞతో సినిమాలు తీయరా దని, పంపిణీ చెయ్యరాదని, ప్రదర్శించరాదని నిర్ణయం తీసు కున్నాయి.
విచిత్రం, విదేశీ చిత్రాల కేటగరీలో ఆస్కార్‌ అవార్డుకు ఈ సినిమా నామినేట్‌ చేయబడింది. ఇంటర్నేషనల్‌ ఫిల్మ్‌ ఫెస్టివల్స్‌ ప్రదర్శనకు అగ్రిమెంట్లు చేసుకున్నాయి. అభిజ్ఞ సినిమాలకై దేశ వ్యాప్తంగా ఓటిటి ఫ్లాట్‌ఫార్ములలో ఎదురుచూపులు మొదలయ్యాయి. మున్ముందు ఉద్వేగం, ఉద్రేకం, ఉన్మాదాలను ప్రేరేపించే సినిమాలను కాదని, సమాజ సమస్యలను ప్రతిబింబిం చే, పరిష్కార మార్గాలు చూపే, సినిమాలను మాత్రమే వీక్షకులు చూస్తారని ఆ ఫ్లాట్‌ ఫార్ములు నమ్మడం మొదలెట్టాయి.