కంచె దాటొచ్చిన ధిక్కార స్వరం

కెంగార మోహన్‌
90007 30403

మనిషి మనుగడే ప్రశ్నార్ధకమైన పరిస్థితి నేడు కొనసాగు తోంది. కొన్నేళ్ళుగా అంటే కేంద్రంలో మతోన్మాద పాలకులు అధికారంలోకి వచ్చాక దేశంలో అసహనం పెరిగిపోయింది. ప్రతీది కార్పొరేట్లకు ధారాదత్తం చేసిన దుస్థితి దేశం ఎదుర్కొంటున్నది. మతాన్ని రాజకీయ ప్రయోజనాలకు వినియోగించుకోవడంలో హిందుత్వ అజెండాతో సాగుతున్న పార్టీలు ముందుంటున్నాయి. దేశమేమైపోయినా ఫర్వాలేదు. ఎన్ని విధ్వంసాలు జరిగినా తమకు మాత్రం అధికారం వస్తే చాలు, పాలనాపగ్గాలు చేతికొస్తే చాలు, దేశప్రజల సెంటిమెంట్లతో ఆడుకోవచ్చనే కాంక్ష ఇటీవల కాలంలో ఎక్కువైంది. కులం, మతం పునాదుల మీద ఒక జాతిని నీతిని నిర్మించలేమన్న అంబేడ్కర్‌ రాజ్యాంగ స్ఫూర్తికి నిరంతరం తూట్లు పొడుస్తూనే ఉన్నారు. రాజ్యాంగం స్థానంలో మనువాదాన్ని అమలు చేయ ప్రయత్నాలు ఇప్పటికే ఆరంభించేశారు. భారతీయులు ఎవరి మతాన్ని వాళ్ళు అవలంబించవచ్చు. కానీ ఇది లౌకికతత్వం కలిగిన విశాల భారతదేశం. ఆ ప్రాథమిక జ్ఞానం లేని వాళ్ల ఉన్మాద చేష్టలకు దేశం నిత్యకల్లోలాలూ ఉద్రిక్తతలూ చూస్తున్నది. జి.వెంకటకృష్ణ రాసిన ఈ కంచెదాటే పాట కంచెదాటొచ్చిన ధిక్కార స్వరంగా ఈ సాంస్క ృతిక ఆర్థిక కోణాలను మనముందు ఇలా వినిపిస్తున్నది.
నోట్ల రద్దు : 2016 నవంబర్‌ 8న జాతినుద్దేశించి ప్రసంగించిన మోడి 500, 1000 నోట్లను రద్దు ప్రకటించారు. దేశం మొత్తం యావత్తు దిగ్భ్రాంతికి గురైంది. దాని పర్యవసానమిలా చెబుతాడు ఈ కవిత్వంలో..
మూలిగే నక్కమీద తాటికాయలా/ సన్నాబన్నా బతుకుల మీద నోట్లరద్దు/ పుండు మీద కారం జల్లినట్టు/ దినవారీ జీవితాల మీద క్యాషులెస్సు... మోడిత్వాన్ని తుద ముట్టించక తప్పదు (గాయ దృశ్యాలు). నోట్ల రద్దులో లాభపడింది కార్పొరేట్లు. క్యూలైన్లో ప్రాణాలు పోగొట్టుకున్నదేమో పేద మధ్య తరగతి ప్రజలు. మరి కవి ఈ మోడిత్వాన్ని తుద ముట్టించాలను కోవడం రాజ్యంపై చేసిన తిరుగుబాటు.
మోడీధ్యానం : రైతులు ఆకలి చావులు చస్తున్నా, పేదలు బతుకు సమరంలో బండబారుతున్నా దేశ ప్రధాని మాత్రం చాలా పద్ధతిగా ధ్యానం చేస్తున్నారు. కరోనా పోవాలంటే చప్పట్లు కొట్టిస్తారు. ఆయన అనుచరులు ఆవుపేడ పూసుకొని గోమూత్రం తాగమంటారు. మోడీ ధ్యానం వెంకటకృష్ణ మాటల్లో..
ధ్యానమంటే కళ్ళుమూసి కుట్రలు రచించడం/ ధ్యానమంటే చేతులు చాచి వంచెనలు కట్టడం/ అజ్ఞాన తిమింగలాన్ని సాకి సర్వాన్ని గుటకేయడం.. (ఒంటికంటి ధ్యానం)
మానవహక్కులపై నిర్బంధాలు : మోడీ ప్రభుత్వం కేంద్రంలో అధికారంలోకి వచ్చాక ప్రశ్నించే గొంతుకల్ని నిర్భంధించడమొక్కటే కాదు. హతమార్చిన ఘటనలూ చూశాం. రాజ్యం చేస్తున్న కుట్రలో ఎందరో బలయ్యారు. బలవుతున్నారు. ఎక్కడ మానవ హక్కులకు విఘాతం కలుగుతుందో, ఎక్కడ ఆదివాసీలుపై దమనకాండ జరుగుతుందో, ఎక్కడ దళిత హక్కుల హరింపబడతాయో, అణగారిన ప్రజలు అణచివేతకు గురయ్యారో అక్కడే నిరసన ధ్వనులు వినిపిస్తాయి. తొంబైశాతం వికలాంగులాంగుడైన ప్రొ.సాయిబాబా పైనా రాజద్రోహం కేసు నమోదు చేయబడింది. ఇది అందుకే వెంకటకృష్ణ అంటాడు..
అతని కలలో ఆయుధాలున్నాయని/ అతనింటిని సోదాచేసి/అవి మనసున భద్రపరిచాడని నిర్ధారించింది/ మూడు తలల సింహం (వీల్‌ చైర్‌ ఫోక్స్‌). అలాగే గత మన్మోహన్‌ ప్రభుత్వ హయాంలో ఆపరేషన్‌ గ్రీన్‌హంట్‌ పేరిట ఆదివాసులపై సాగిన దాడికి వ్యతిరేకంగా పోరాడిన గిరిజన హక్కుల కార్యకర్త, తమిళనాడుకు చెందిన క్రైస్తవ మతాచార్యుడు స్టాన్‌స్వామిని భీమ్‌ కొరగావ్‌ కేసులో అరెస్టు చేసిన పాలకులు అనారోగ్యం లోనూ ఉపశమనం కలిగించకుండా బలిగొన్నారు. ఆయనను గుర్తుచేసుకుంటూ వెంకటకృష్ణ ఇలా అంటాడు ..
ఆశయం సత్యబద్ధమైనపుడు/ దాన్ని ఆచరించే స్థానం దూరమైనప్పుడు/ నువ్వు జీవించింది జైలు/ స్వభావాలు, ఇరికించే దృక్పథాలు/ బరితెగించిన నిర్బంధాలు విడుదల కానీయ్యని ఖైదులు (స్టాన్‌ స్వామి).
ఈ కవితకు ఏం శీర్షిక పెట్టాలో అర్థంకాక స్టాన్‌ స్వామీ అనేసినట్లుంది.
మతోన్మాదం : పంజాబీ సూఫికవి బుల్లేషా అంటాడు : మసీదుని, దేవాలయాన్ని నేలమట్టం చేయండి. నేలమట్టం చేయవీలైన దానినంతా నేలమట్టం చేయండి. అయితే ఎప్పుడూ ఎవరి హృదయాన్ని ముక్కలు చేయవద్దు. ఎందుచేతనంటే భగవంతుడు అక్కడే వుంటాడు. మరి దేశంలో ఈ రోజు మతోన్మాదం పురివిప్పి హిజాబ్‌ ఘటనతో కన్నడ రాజ్యం అట్టుడుకుతున్నది. అదే కర్నాటకలోని బాగేవాడకు చెందిన బసవేశ్వరుడు (1134-1196) ఆనాడే మనుషులంతా ఒక్కటేనని ప్రబోధించి లక్షల ప్రవచనాలతో అసమానతలు లేని సమాజంకోసం తన కోణంలో కృషిచేశారు. తన అనుభవ మంటపంలో లక్షల మందికి పేద దళిత బహుజనులు, అన్నీ కులాలవాళ్ళు సహపంక్తిగా కూర్చుని భోజనం చేశాక తను భుజించాడు. విగ్రహారాధనను వ్యతిరేకించాడు. శ్రమలో దైవత్వముందని, దేహమే దేవాలయమని ప్రబోధించాడు. హిందూమతం మానవత్వం వైపు పయనించడం లేదని అన్నాడు. ఇప్పుడు అదే గడ్డపై ఇప్పుడు మత విద్వేషాలు కుల దురహంకారాలు ప్రకోపిస్తున్నాయి. వెంకటకృష్ణ బసవేశ్వరుడిని స్మరించాడు తన కవిత్వంలో..
హిందుత్వ రాజకీయుల గుండెల్లో/ నువ్వు మోగించిన తిరుగుబాటు ఢంకా/ హేతువు విసిరిన సవాళ్ళు/ మింగుడు పడని నిప్పుకణికలు/ కమండల దళాల కళ్ళలో/ నీ రాతలు రగిలే కారం రేణువులు/ మండే నిప్పుకణికలు/ అవి చెన్న బసవడి ధిక్కార వచనాలు..( ధిక్కార వచనం)
శంభూకుని వారసులు రామదండుని/ ప్రశ్నించక మానరు/శూర్పణక సంతానానిదే న్యాయం/ నీ దురాక్రమణ యాగాలను ఆపక మానరు/ ఆదివాసీ అడుగులన్నీ/ మూలవాసుల ఆకాంక్షల్ని రగిలించకపోవు/ నిన్నెదిరించే వాళ్ళంతా బీమాకోరెగావ్లో/ మొలిచిన గడ్డిపోచలే/ నువ్వు బిగించిన చేతికి చుట్టుకునే తాళ్ళే/ అవి నీకు రుచించని చేదు నిజాలే..
తపస్సు చేసినందుకే శంభూక వధ చేసిన రాముడు ..శూర్పణక ముక్కు కోసిన లక్ష్మణుడు, బీమా కోరేగావ్‌లో నెత్తుటి కల్లాపి జల్లిన పేష్వాలు ... ఇవన్నీ ఒక్క కవితాపాదంలో చెప్పేస్తాడు.
నువ్వు విడమరచిన కలలెన్నో/ ఎదురు చూస్తున్నవి/ నువ్వు గొంతు విప్పిన పాటలెన్నో/ మూగబోయి వున్నవి/ నువ్వు అనువదించాల్సిన గాథలెన్నో/ గొల్లుమంటున్నవి/ నువ్వు కనులు తెరిచే నిద్ర చాటున/ రెప్పలు వేచి వున్నవి.. (ఒక శ్రవణుడి మరణం)
ఈ కవిత గాఢతగా రాశాడు వెంకటకృష్ణ. ఈ కవి స్పష్టంగా ఈ కవిత్వం ద్వారా లాల్‌ నీల్‌ ఐక్యతను కలగంటాడు.
స్మ ృతి కవిత్వం : కవిత్వంలో స్మ ృతి అన్నది ప్రధాన పాత్ర పోషిస్తున్నది. చాలా మంది కవులు ఎక్కువగా స్మృ తి మీద, కాలం మీద అమ్మ మీద కవిత్వం రాసి ఉంటారు. ఈ కవి కవిత్వం స్మృతి అనకానేక సామాజిక ఉద్యమాల్లోనూ, ప్రజాతంత్ర ప్రగతిశీల ఉద్యమాల్లో ప్రాణాలు కోల్పోయిన వాళ్ళను స్మృతి కవిత్వంగా రాస్తూ పోయాడు. అలా మాట్లాడటం కూడా అనేక ఘటనలతో పోలుస్తాడు. కత్తి మహేష్‌ గుర్తుకు తెచ్చుకుంటూ..
నువ్వు సత్యం మాట్లాడితే/ అసత్యాల బరువు కింద/ముంచేయడమొక విద్య/ నువ్వు న్యాయం అడిగితే/ అన్యాయాల చెలామణిలో/ నిను తోసేయడమొక కళ/ ఇది ధర్మమా అని అడిగావంటే/ తరతరాల సాంప్రదాయాన్నే ప్రశ్నిస్తావా? అని నిను తుంచేయడమొక వ్యూహం (తెల్లటి చీకటి).. ఈ కవిత చదివాక కత్తి మహేష్‌ మరణం మీద కూడా నాకు అనుమానం కలుగుతుంది. ఈ కవితల్లో రాయలసీమకు జరిగిన అన్యాయం, కరోనా, అనేకానేకంశాలు కవిత్వమయ్యాయి.