గురజాడ యుగస్వరం పరిచయ సభ

గ్రంథాలయ వారోత్సవాల్లో భాగంగా విజయనగరం సాహితీస్రవంతి, సరోజినీ మహిళామండలి సంయుక్త ఆధ్వర్యంలో నవంబర్‌ 19న గురజాడ గ్రంథాలయంలో తెలకపల్లి రవి పుస్తకం 'గురజాడ యుగస్వరం' ఆవిష్కరణ జరిగింది. సాహితీస్రంతి రాష్ట్ర కార్యదర్శి చీకటి దివాకర్‌ అధ్యక్షతన జరిగిన ఈ సభలో మాజీ ఎంపి డివిజి శంకర్రావు పుస్తకాన్ని ఆవిష్కరించారు. ప్రముఖ సాహితీ విమర్శకులు రామతీర్ధ ఈ గ్రంథాన్ని పరిచయం చేశారు. ఈ సందర్భంగా పుస్తక రచయిత తెలకపల్లి రవి మాట్లాడుతూ  నేటి సమాజానికి అనుగుణంగా గురజాడ రచనలపై సమగ్ర పరిశోధన చేయాల్సిన అవసరం ఉందని, ఆయన రచనలు మానవీయ సంబంధాలకు అద్దం పట్టడంతో పాటు మత ఛాందసవాదుల భావజాలాన్ని బద్దలు కొడతాయని అన్నారు. గురజాడ స్మారకభవనంలో ఆయన పుస్తకాలు, రచనలను భద్రపరచాలని సూచించారు. విజయనగరంలో గురజాడ అధ్యయన కేంద్రాన్ని ప్రభుత్వం ఏర్పాటు చేయాలని డిమాండు చేశారు. గురజాడ బాధలు, కష్టాలను అనుభవించిన వ్యక్తి కావడంతో ఆయన రచనల్లో మానవీయ సంబంధాలను సాక్షాత్కరించాయన్నారు. సాహిత్యానికి గురజాడ ఒక యుగపురుషుడని కొనియాడారు.గురజాడ సాహిత్యం ఒక సముద్రం, భాషకు ఆయనొక వరమని డివిజి శంకర్రావు అన్నారు. నేటి సమకాలీన పరిస్థితులకు అనుగుణంగా గురజాడ రచనలు ఉన్నాయని,  చాందసవాదం ఎక్కువగా ఉన్న సమయంలోనే గురజాడ నిక్కచ్చిగా ఖండించగా, నేడు ఆధునిక యుగంలో భావప్రకటనా స్వేచ్ఛకు అడ్డుతగలడం ఈ సమాజం ఎటుపోతోందో అర్ధం కావడం లేదన్నారు. గురజాడ ఆశయాలను ముందుకు తీసుకెళ్లడానికి అంతా క షి చేయాలన్నారు.ఈ సమాజాన్ని పట్టించుకున్నవారే గురజాడ వారసులవుతారని రామతీర్ధ అన్నారు. గురజాడ అనేక సార్లు నాది ప్రజా ఉద్యమం అని చెప్పారని గుర్తు చేశారు. ఆయన రచనలు నచ్చచెప్పే పద్ధతిలో ఉంటాయన్నారు. ఎంతో ముందు చూపుతో గురజాడ రచనలు అర్ధం చేసుకోవడానికి గురజాడ యుగస్వరం పుస్తకం దోహదపడుతుందన్నారు.ప్రముఖ కవి గంటేడ గౌరినాయుడు మాట్లాడుతూ గురజాడ అడుగు వంద అడుగల కన్నా పెద్దదని, అందుకే నేటి సమాజం ఎంత చేసినా గురజాడ రచనలను అందుకో లేకపోతుందన్నారు. సరోజినీ మహిళా సంఘం నాయకురాలు ఈశ్వరీమోహన్‌ మాట్లాడుతూ, స్త్రీ వంటింటికి పరిమితం కాదన్న విషయాన్ని గురజాడ ఏనాడో చెప్పారన్నారు. కానీ స్త్రీలపై నేటికీ దాడుల జరగడం బాధాకరమన్నారు. కార్యక్రమంలో సాహితీస్రవంతి ఉపాధ్యక్షులు ఎస్‌విఆర్‌ కృష్ణారావు, చంద్రిక, డప్పుశ్రీను, గాంధీ, పలువురు రచయితలు, కవులు, కళాకారులు, మహిళలు, యువత పాల్గొన్నారు.