కాకినాడలో అద్దేపల్లి ద్వితీయ వర్థంతి సభ

కాకినాడ సాహితీస్రవంతి ఆధ్వర్యంలో జనవరి 21న ప్రముఖ కవి, విమర్శకులు డా|| అద్దేపల్లి రామమోహన రావు ద్వితీయ వర్థంతి సభ కాకినాడలోని గాంధీభవన్‌లో జరిగింది. సభాధ్యక్షులుగా సాహితీస్రవంతి కాకినాడ పట్టణ గౌరవాధ్యక్షులు వుయ్యపు హనుమంతరావు వ్యవహరించారు. ముఖ్యవక్తగా ఏలూరు సబ్‌రిజిస్ట్రార్‌, ప్రముఖ కవి, పరిశోధకులు డా|| లంకా వెంకటేశ్వర్లు ప్రసంగించారు. ఆయన మాట్లాడుతూ అద్దేపల్లితో తనకు గల సాహిత్యానుబంధాన్ని నెమరువేసుకొన్నారు. సమకాలీన కవిత్వంలో వృత్తిచైతన్యం అనే అంశంపై తాను చేసిన పిహెచ్‌డి పరిశోధనకు అద్దేపల్లి ఆత్మీయ పరిశోధకునిగా ఉన్నారన్నారు. తన సాహితీయానంలో ప్రతీ అడుగులోనూ అద్దేపల్లి సహాయసహకారాలు దండిగా లభించాయని తెలిపారు. ఈ కార్యక్రమంలో గడీల శివప్రసాద్‌, నాగాస్త్ర, గనారా, మార్ని జానకిరాం, డా. జోశ్యుల కృష్ణబాబు, ఉండవల్లి, వసుమర్తి పద్మజవాణి, అద్దేపల్లి జ్యోతి, పద్మావతి, వక్కలంక శారద, పుప్పాల సూర్యకుమారి, వూసల ఎజ్రాశాస్త్రి, మేడిశెట్టి శ్రీరాములు, గరికపాటి మాష్టారు, శిరీష, ఇంద్రగంటి నరసింహమూర్తి, పెద్దింటి రామకృష్ణలు పాల్గొన్నారు. అనంతరం జరిగిన కవిసమ్మేళనానికి 'శ్రీహస్త' అధ్యక్షత వహించారు. పద్మజావాణి వందన సమర్పణతో సభ ముగిసింది.