అనంతపురం జిల్లా, కదిరికి చెందిన ఎద్దుల మహాలక్ష్మి తన భర్త పేరుతో ప్రతీ సంవత్సరం సాహిత్య ప్రస్థానం మాసపత్రిక సహకారంతో డాక్టర్‌ ఎద్దుల సిద్ధారెడ్డి స్మారక పురస్కారం అందించనున్నారు. అందుకోసం సాహిత్య ప్రస్థానం మాసపత్రికకు ఒక లక్షాయాభైవేల రూపాయలను అందజేసారు. ఆ మొత్తాన్ని ఫిక్స్‌డ్‌ డిపాజిట్‌ చేసి వడ్డీగా వచ్చిన మొత్తంతో ప్రతీ సంవత్సరం జనవరిలో ఈ పురస్కారాన్ని అందించడం జరుగుతుంది. సాహిత్య ప్రస్థానంలో జనవరి నుండి డిసెంబర్‌ వరకూ ప్రచురించిన కథ, కవిత, వ్యాస ప్రక్రియలలో ఉత్తమమైన ఒకటి లేదా రెండు రచనలకు నగదు పురస్కారాన్ని అందించడం జరుగుతుంది. ఎద్దుల మహాలక్ష్మి తన భర్త డా|| ఎద్దుల సిద్ధారెడ్డి ప్రగతిశీల భావాలను, సాహిత్య అభిమానాన్ని గౌరవిస్తూ ఈ నిర్ణయం తీసుకున్నారు. అనంతపురం జిల్లా కదిరిలో సాహితీస్రవంతి రాష్ట్ర కమిటీ సభ్యులు పి. కుమారస్వామి ఆధ్వర్యంలో జరుగుతున్న సాహిత్య కార్యక్రమాలకు ఆర్థిక ప్రోత్సాహాన్ని అందిస్తున్నారు. తెలుగు భాషా సాహిత్య కృషికి ఎద్దుల మహాలక్ష్మి అందిస్తున్న తోడ్పాటుకు సాహిత్య ప్రస్థానం అభినందనలు తెలియజేస్తున్నది.