సంస్మరణ
- తెలకపల్లి రవి
నూతన సహస్రాబ్ది ప్రారంభంగా 2000 సంవత్సరంలో తెలుగు సమాజాన్ని సమరపథం తొక్కించిన విద్యుత్తేజానికి సంకేతం విద్యుచ్ఛక్తి పోరాటం. కాలంలో మార్పుతో పాటు రాజకీయాలలో కూడా విద్యుదుద్యమానికి ముందు తర్వాత అని విభజించవలసిన ప్రస్పుటమైన ప్రభావం ప్రసరించిన ప్రజాచైతన్య ప్రవాహం. రెండవసారి ముఖ్యమంత్రి పదవి చేపట్టి హైటెక్‌ పాలకుడుగా సిఇవోగా ప్రపంచబ్యాంకు అడుగు జాడల్లో విద్యుత్‌ బోర్డును విభజించి ప్రైవేటీకరించి ప్రజలపై రాష్ట్రంపై భారాలు రుద్దిన చంద్రబాబు ప్రభుత్వ విధానాలను నిలవేసిన ప్రతిఘటన. వామపక్షాల చొరవతో మొదలైన కాంగ్రెస్‌ సహా అన్ని ప్రతిపక్షాలూ ఆ పోరాటంలో భాగం పంచుకోవలసిన పరిస్థితిని తీసుకొచ్చింది. నిర్బంధాలను తట్టుకుంటూ విలక్షణ పోరాట రూపాలను సృష్టించి ప్రజల్లోకి చొచ్చుకువెళ్ళింది. కొత్త తరాలలో సమరశీలత సన్నగిల్లుతున్నదన్న అపప్రదను తుత్తునియలు చేసింది. పోరాటానికి పతాకస్థాయిగా ఆగస్టు 28న చలో అసెంబ్లీ కార్యక్రమం ఒక సంచలనమై బషీర్‌బాగ్‌ను జలియన్‌వాలాబాగ్‌ అనిపించింది. ఆ అమరవీరులు ప్రజాపోరాటాల చరిత్రలో నిలిచిపోగా లాఠీ దెబ్బలకు, తూటాలకు గురైన ఎందరో కార్యకర్తలు పోరాటా పోఠాలు నేర్చుకుని నేటికీ ఉద్యమాలలో ముందు నిలబడుతున్నారు. విద్యుచ్ఛక్తి సమరం రాష్ట్రంలోనే గాక దేశంలోనూ ప్రపంచంలోనూ కూడా గొప్ప ప్రభావం చూపించి ప్రపంచబ్యాంకు ప్రజావ్యతిరేక నమూనాపై ప్రజాఉద్యమాల నిర్మాణానికి స్ఫూర్తి నిచ్చింది. ఆ తర్వాత కొద్ది కాలానికే ఆసియా సామాజిక వేదిక అంతర్జాతీయ సమావేశాలు కూడా హైదరాబాద్‌లోనే జరిగాయంటే ఈ పోరాట ప్రభావమే కారణం. క్షేత్రస్థాయి పోరాటాలతో పాటు మీడియాలోనూ ప్రత్యామ్నాయాలను ముందుకు తెచ్చి కొత్త ముద్ర వేసింది. ప్రజల ఆగ్రహౄనికి అసంతృప్తికి అద్దం పట్టిన ఈ ఘట్టం తర్వాతనే కెసిఆర్‌ టిఆర్‌ఎస్‌ ఒకవైపు, వైఎస్‌ఆర్‌ ప్రజాప్రస్థానం మరోవైపు తమ తమ రాజకీయ లక్ష్యాలవైపు నడిచాయి. తొమ్మిది వామపక్షాల ఐక్యతకూ ప్రజా సంఘాల సమన్వయానికి వారధిగా నిలిచింది. ఈనాటికీ ప్రజలు ఏ సమస్య వచ్చినా వామపక్షాలే వాటిపై పోరాటానికి ముందుంటాయనే బలంగా విశ్వసిస్తూ అండదండలిస్తున్నారంటే ఆ వరవడి ఒక కారణం. ఇప్పటికీ తెలుగు రాష్ట్రాలలో సూటిగా విద్యుత్‌ ఛార్జీలు పెంచడానికి జంకుతున్న పాలకులు డొంకతిరుగుడుగా ప్రకటిస్తుంటారు. నాటి నేటి పాలక పక్షాల అవకాశవాదం కారణంగా ఆ విధానాలు మరింత ముదిరిపోయినా కరోనా కల్లోలంలోనూ సమస్యలను వినిపించడమే గాక ఆన్‌లైన్‌ పోరాటాలు పరిమితుల్లోనే ఉద్యమాలు సాగించడం చూస్తూనే ఉన్నాం. ఇప్పటికైనా ఎప్పటికైనా పోరాటాలు ఉద్యమాలతోనే పాలకుల పోకడలకు పగ్గాలు వేయడం సాధ్యమనే సందేశమే విద్యుదుద్యమం ఈనాడు మరోసారి కేంద్రం తెచ్చిన సరికొత్త వినాశకర జాతీయ విద్యుత్‌ విధానాన్ని వెనక్కుకొట్టడానికి మార్గదర్శకంగా నిలిచే చారిత్రక వారసత్వం అది. అందుకే ఆ మహత్తర చైతన్యానికి జేజేలు.