అక్రమ రవాణా

నల్లపాటి సురేంద్ర
94907 92553

''హైవేలో జరుగుతున్న ప్రమాదాలకు కారణం ఆకతాయిల చేష్టలు. అలాగే సమాజాన్ని పట్టి పీడిస్తున్న మరో అనైతిక చర్య అక్రమ రవాణా. వీటికి అడ్డుకట్ట వేయడం మన ప్రధాన బాధ్యత. జాగ్రత్త వహించండి.'' అన్నాడు ఎస్‌ఐ చంద్ర. రోజువారీ కేసులు, శాంతిభద్రతలు చూస్తూనే ఈ విషయాలపై తాను ప్రత్యేక దృష్టి పెట్టాడు. సహాయంగా కానిస్టేబుల్‌ రాజు, మహిళ కానిస్టేబుల్‌ వనిత ఉన్నారు. అనుమానం వస్తున్న ప్రతి వాహనం ఆపుతూ.. అన్ని సక్రమంగా ఉన్నాయో లేదో చూస్తున్నారు.
''వనితా.. మీరు మహిళలు నడుపుతున్న బండ్లను ఆపండి. హెల్మెట్‌, లైసెన్స్‌ లేకపోతే అసలు వదలొద్దు. ఈ మధ్య ఇలాంటి ప్రమాదాల బారిన మహిళలే ఎక్కువ గురవుతున్నారు. మనం హెచ్చరిస్తూ ఉంటే కంట్రోల్‌లో ఉంటారు' అని ఎస్‌ఐ చెబితే 'సరే సార్‌' అంది వనిత.
కాసేపు తర్వాత ఒక వ్యాన్‌ అటు వైపు వస్తుంటే.. దానిని ఆపారు. ఆ వ్యాన్‌ లోపల ఓ ఆవు ఉంది. దీంతో ప్రశ్నల వర్షం కురిపించారు. వ్యాన్‌ డ్రైవరుతో పాటు.. క్లీనరుని కిందికి దింపి ''అసలు ఎక్కడ నుంచి వస్తున్నారు'' అంటూ ఎస్‌ఐ గద్దించి అడిగాడు.
వ్యాన్‌ దిగిన వ్యక్తి ''సార్‌.. నా పేరు అజరు. మేము హైదారాబాద్‌లో ఒక గృహ ప్రవేశానికి ఆవును తీసుకెళ్తున్నాం'' అన్నాడు.
''మరి రెండు ఆవులు ఎందుకు?'' అని అడిగాడు ఎస్‌ఐ.
''రెండు గృహ ప్రవేశాలు ఉన్నాయి సార్‌, ఒకే ముహర్తానికి''
''అబ్బా. ఛా... ఎప్పుడూ ఇలానే చెబుతారా? లేక సమయం వచ్చినప్పుడు ఇలా చెబుతారా?''
ఎస్‌ఐ ప్రశ్న వాళ్లకే కాదు.. పక్కన ఉన్న పోలీసులకు కూడా అర్థం కాలేదు.
వ్యాన్‌ డ్రైవర్‌ వైపు చూస్తూ ''నీ పేరు ఏమిటి? ఎక్కడ నుంచి వస్తున్నావు? ఎప్పుడూ నువ్వే వస్తావా.. లేదా మరొకరు వస్తారా? ఒక్క ఆవును తరలిస్తే ఎంత ఇస్తారు నీకు?'' అంటూ ఎస్‌ఐ కోపంగా అడగడంతో ఆ డ్రైవర్‌ భయపడిపోయాడు.
''సార్‌ నా పేరు రాజు అండీ.. నాకు ఏం తెలియదు సార్‌. ఈ రోజే తొలి బేరం ఒప్పుకున్నా'' అంటూ వెక్కి వెక్కి ఏడుస్తుంటే..
''భలే నటిస్తున్నావు.. నీకు సినిమాల్లో మంచి ఫ్యూచర్‌ ఉంది'' అంటూ వెటకారంగా అన్నాడు.
ఆ డ్రైవర్‌ ''సార్‌.. నిజంగా నాకేం పాపం తెలియదు'' అంటూ.. ''నన్ను వదిలేయండి'' అంటూ ప్రాధేయపడ్డాడు.
''ఎస్‌ఐ సార్‌.. మీ ఉద్దేశం ఏమిటి? మీరు మమ్మల్ని తప్పుగా అర్థం చేసుకుంటున్నారు'' అంటూ అజరు మాట్లాడాడు కొంచెం కోపంతో.
''నా ఉద్దేశం ఏమిటో నా నోటి నుంచి చెప్పాలా? మీరు ఈ ఆవులను కబేళాకు తరలిస్తున్నారు అనే విషయం కనిపెట్టలేను అనుకున్నారా?'' అన్నాడు కోపంగా.
ఆ ఇద్దరు ఒకేసారి ''సార్‌'' అన్నారు గట్టిగా.
''మీరు తప్పుగా అనుకుంటున్నారు. కావాలంటే ఈ గృహ ప్రవేశ పత్రిక చూడండి. ఈ ఇంటికే వెళ్తున్నాం. కావాలంటే మీరు ఎంక్వైరీ కూడా చేయండి.'' అన్నాడు అజరు.
''నేను ఇలాంటి కేసులు వందల్లో చూశాను. ప్రతి ఒక్కరూ దొరికితే చెప్పే మాట ఇదే. అసలు ఆవు అంటే అర్థం తెలుసా? దాని విలువ తెలుసా రా మీకు? అసలు ఎంత ఇస్తారు వాళ్ల్లు మీకు? ఈ మార్కెట్‌ ఎక్కడ ఉంది? రోజు ఈ వ్యాపారం చేస్తారా? లేక ఆదివారం మాత్రమేనా? మీకు డీలర్‌ ఎవరైనా ఉన్నారా? లేక నువ్వే డైరెక్ట్‌ డీలింగ్‌ చేస్తావా చెప్పు'' అంటూ అజరు మీద విరుచుకుపడ్డాడు ఎస్‌ఐ.
ఆ మాటలకు మిగతా ఇద్దరూ భయపడ్డారు.
''నిజంగానే గృహ ప్రవేశానికే'' అంటున్నా ఎస్‌ఐ వినిపించుకోలేదు.
''ఆవులు పెంచితే రైతులే కాదు. దేశం కూడా అభివృద్ధి చెందుతుంది. కానీ, మీరు డబ్బు కోసం, ఎలాంటి పనులు చేయడానికయినా సిద్ధం అయ్యారు. అందుకే కేంద్ర ప్రభుత్వం ఆవులను అక్రమంగా ఎగుమతి చేయడం, క్రూరంగా వధించడం నేరమని కూడా పరిగణించింది. ఎలాంటి అనుమతులూ లేకుండా.. ఒక రాష్ట్రం నుంచి ఇంకో రాష్ట్రానికి పశువులను తీసుకెళ్లడం నేరం. అడ్డదారుల్లో వేలాది పశువులను ఇలాగే తీసుకెళ్తున్నారు. ఇన్నాళ్లూ నిఘా లేదు కాబట్టి.. మీ వ్యాపారం ఆరు ఆవులు ఏడు గోవులుగా సాగింది'' అన్నాడు.
ఎస్‌ఐ ప్రవర్తనకి ఇద్దరూ కంగారుపడిపోయారు. దుఃఖంతో కుమిలిపోయారు. ''మేము చెప్పింది నిజం'' అంటున్నా వినే స్థితిలో ఎస్‌ఐ లేడు.
పక్కన ఉన్న పోలీస్‌ కూడా ''సార్‌ .. ముందుగా వీరి దగ్గర ఉన్న ఫోన్లు లాక్కోని బాగా చెక్‌ చేయండి. పశురవాణా చట్టం 1978 ప్రకారం ఒక ప్రాంతం పశువులను ఇతర ప్రాంతాలకు తరలించాలంటే మండల రెవెన్యూ శాఖ వారి అనుమతి తీసుకోవాలి'' అన్నాడు.
''ఆ విషయం మాకు తెలియదు సార్‌'' అన్నారు ఇద్దరూ.
ఒక వ్యానులో అయితే రెండు పశువులను మించి ఎక్కించకూడదు. పశువులను తరలిస్తున్న వాహనంలో గాలి, వెలుతురు వచ్చే సదుపాయం ఉండాలి. పశువులకు నీరు, ఆహారం ఏర్పాటు ఉండాలి. ప్రతి అరగంటకోసారి పశువులను వాహనం దింపి, అవి సేద తీరే విధంగా సదుపాయా లు కల్పించాలి. ఇక గర్భంతో ఉన్న పశువులను ఎట్టి పరిస్థితుల్లోనూ తరలించకూడదు. నిబంధనలు పాటించకుండా పశువులను రవాణా చేస్తే, ఆ వాహనాన్ని పోలీసులు సీజ్‌ చేసి క్రిమినల్‌ కేసులు నమోదు చెయ్యొచ్చు. అందుకే మీ బండి సీజ్‌ చేస్తున్నాము'' అంటూ చెప్పాడు ఎస్‌ఐ.
వారిద్దరూ ఎస్‌ఐ కాళ్ళ మీద పడ్డారు.
అతడు ఇంకే పునరాలోచనా లేచయలేదు.
ఇంతలో ఒక కారు చాలా వేగంగా రావడం గమనించిన వనిత ఆ బండిని ఆపింది .
డ్రైవర్‌, అతని పక్కన ఓ యాభై ఏళ్ల ఆడ మనిషి ఉంది. వెనుక సీటులో పెళ్లి కొడుకు బట్టల్లో నలభై ఏళ్ళు దాటిన మనిషి ఉన్నాడు. అతని పక్కన పెళ్లి చీరలో పద్నాలుగు సంవత్సరాల పాప ఉంది. ఆ పక్కనే మరో పాప కూడా ఉంది. ఎవరి మొహాలూ పెద్ద కలివిడిగా లేవు. వారి వైఖరి అనుమానంగా ఉండడటంతో వనిత వెంటనే ఎస్‌ఐ గారిని పిలిచింది.
ఎస్‌ఐ ఆవు తీసుకొచ్చిన వాళ్ళని మరో కానిస్టేబుల్‌కి అపచెప్పి ''జాగ్రత్తగా చూస్కో .. పారిపోతారు'' అని చెప్పి కారు దగ్గరకి వచ్చాడు.
''ఏమైంది'' అని వనితను ప్రశ్నిస్తే, ఆమె ''సార్‌.. వీళ్ళను చూస్తే చాలా అనుమానంగా ఉంది. పెళ్లి కొడుకు ఏజ్‌ బార్‌ మనిషిలా ఉన్నాడు. పెళ్లి కూతురు చిన్న పాపలా ఉంది'' అంది
ఎస్‌ఐ వాళ్ళని చూసి పెదవి విరిచాడు.
''నీ అనుమానం ఏమిటి వనిత? ఏ బండి ఆపాలి? ఏది ఆపకూడదు? అనే విషయం తెలియదా? కారుకి అంటించి ఉన్న పువ్వులను బట్టి.. అలాగే పెళ్లి కొడుకు పెళ్లి కూతురు వేసుకున్న దండలని బట్టే చెప్పచ్చు .. వారు కల్యాణ మండపం నుంచి వస్తున్నారని.'' అన్నాడు.
''సార్‌.. అమ్మాయికి పెళ్లి కావాలంటే, ఇరవై ఒక సంవత్సరాలు ఉండాలి. కానీ ఈ అమ్మాయికి పద్నాలుగు కూడా ఉండవు'' అంది వనిత.
''ఆమెను చూసి ఎలా చెప్పగలవు వనిత ? చాలా మందికి వయసు పెరిగితే మాత్రం, బరువు పెరగాలని లేదు .. పొడవు పెరగాలని లేదు కదా'' అన్నాడు ఎస్‌ఐ తాపీగా.
''ఐడీ కార్డులు అడగండి సార్‌ ఒకసారి'' అంది.
ఎస్‌ఐ వెంటనే ''ఏమిటి వనిత. వీళ్ళను ప్రశ్నించడం వల్ల మనకే టైం వేస్ట్‌. కాస్త కామన్‌ సెన్స్‌ వాడు'' అని చెప్పి వాళ్ళని పంపిచేస్తాడు ఎస్‌ఐ.
వెంటనే కార్‌ వేగంగా వెళ్ళిపోతుంది. వనిత కారును కార్‌ నంబర్‌ను ఫొటో తీసింది.
''సార్‌.. వీరిని ఏ ఎంక్వైరీ లేకుండా పంపించడం ఎందుకో బాగోలేదు సార్‌. నాకు ఇప్పటికీ మనసు అంగీకరించడం లేదు'' అంది, విధేయంగానే.
''చూడు వనిత.. నీకు డ్యూటీ కొత్త. డౌట్‌ వచ్చిందని, ప్రతి వాహనాన్ని చెక్‌ చేసుకుంటూ పోతే.. మన పనులు చాలా పెండింగులో పడిపోతాయి.'' అన్నాడు.
కార్‌ నంబర్‌ ఒరిస్సాది సార్‌. వారు వెళ్తున్నది హైదరాబాద్‌. అంత దూరం నుంచి ఇక్కడికి రావడం అంటే ఏదో అను మానంగా ఉంది సార్‌. ఇంకో ముఖ్య విషయం ఏమిటంటే.. ఇది పెళ్లిళ్ల సీజన్‌ కాదు. మరి ఎలా పెళ్లి అయింది? ఎక్కడ అయింది? కనుక్కోవల్సింది.'' అంది. తరువాత తన జర్నలిస్టు ఫ్రెండ్‌ ఇందిరాకి ఫోన్‌ చేసి విషయం చెప్పి కారు ఫొటో, నెంబర్‌ పంపింది.
''మీరు ఆవుతో వచ్చిన వాళ్ళని ఎన్నో ప్రశ్నలు వేశారు. వారు చెప్పింది వినలేదు. కానీ ఇక్కడ చిన్న పిల్ల పెళ్లి బట్టలలో ఉంటే కనీసం 'ఏ ఊరు? ఎక్కడ నుంచి వచ్చారు? ఏం చదివావు? అని కూడా అడగలేదు. మీ తల్లి దండ్రులు ఎవరు? ఆ పక్కన ఉన్న ఆడ ఆవిడ ఎవరు? అని అడగలేదు'' అంటూ తన బాధను వ్యక్తపరిచింది.
ఎస్‌ఐ ఏదో చెబుతుంటే.. ''మీరేం చెప్పద్దు సార్‌ .. మీకు ఆవులు మీద ఉన్న శ్రద్ధ మా ఆడవాళ్ల రక్షణ మీద లేదు. పశు చట్టాలు గురించి చెప్పిన మీరు.. ఐపీసీ 366 ఎ ప్రకారం పద్దెనిమిదేళ్లు లోపు బాల బాలికలను ఒక చోటు నుంచి మరొక చోటుకి తరలిస్తే పదేళ్లు జైలు శిక్ష.. ఐపీసీ 372, 373 ప్రకారం బాలికలను వ్యభిచారంలోకి దించడం .. ఇతరులకు విక్రయించడం చేస్తే పదేళ్లు జైలు శిక్ష ఉంటాయని ఎందుకు ఆలోచించలేదు. సింపుల్‌ గా అయిదే అయిదు నిమిషాలు మాట్లాడి పంపించేశారు. ఆవులను తీసుకొచ్చిన వాళ్ళని.. రెండు గంటల నుంచి విచారిస్తూనే ఉన్నారు.'' అంది విధేయపూర్వకంగానే.
''ప్రపంచ వ్యాప్తంగా జరిగే అక్రమ రవాణాలో 28 శాతం ఆడపిల్లలే ఉన్నారు. వెట్టి చాకిరి, బిక్షాటన, అవయవ దోపిడీ, వ్యభిచారం.. ఇవన్నీ దళారులు వాళ్ళతోనే చేయిస్తున్నారు.'' తనలో తానే గొణుక్కుట్టుగా అంది.
ఎస్‌ఐకి ఆశ్చర్యంగా అనిపించింది. ఆలోచనలలో పడేసింది.
ఇంతలో ఇందిర ఫోన్‌.
''వాళ్ళని పట్టుకున్నాం. నీ అనుమానం నిజమే వనిత'' అంది.
''సార్‌. ఇప్పటికైనా మీరు వస్తారా? మా ఫ్రెండ్‌ ఇందిర.. టౌన్‌ పోలీసుల సహాయంతో వారిని చేజ్‌ చేసి పట్టుకున్నారు. మీరు వస్తే, మిగతా వివరాలు తెలుస్తాయి'' అంది.
ఎస్‌ఐ ఆవులను తెచ్చిన వారి వద్ద వివరాలు తీసుకొని పంపేయమని మరో కానిస్టేబుల్‌ని పురమాయించాడు. తాను ఆ కారు దొరికిన ప్రదేశానికి బయల్దేరాడు.
కాసేపటి తర్వాత బ్రేకింగ్‌ న్యూస్‌ వచ్చింది టీవీలో...
''బాలికల అక్రమ రవాణా ముఠా అరెస్ట్‌..
పేద కుటుంబాలే వారికి టార్గెట్‌. ఒరిస్సాకి చెందిన ఇద్దరు బాలికలను చెరో లక్ష రూపాయలకు కొనుగోలు చేసిన హైదరాబాదు చెందిన వ్యక్తులు''
కానిస్టేబుల్‌ వనితను, జర్నలిస్ట్‌ ఇందిరను అభినందించారు పోలీసు కమిషనర్‌. ఈ సంఘటన జరిగాక, సిటీతో పాటు హైవే ప్రాంతాల్లో నిఘాను పటిష్టం చేశారు.
ఓ రోజు ఎస్‌ఐ .. వనితను పిలిచి ''యూ డిడ్‌ ఏ వండర్‌ ఫుల్‌ జాబ్‌ వనిత. నేను వద్దన్నా, ఆ రోజు నువ్వు చూపిన చొరవే ఈ అమ్మాయిలను కాపాడింది'' అంటూ ప్రశంసిం చాడు.
''థాంక్యూ సర్‌.'' అంది వనిత.
ఆమె మొహంలో ఏ మాత్రం గర్వం లేదు. నిర్మలంగా ఉంది. తన బాధ్యతను తాను సరిగ్గా నిర్వర్తించాను అనుకుంటూ, మరింత ఆత్మస్థైర్యంతో అడుగులు ముందుకు వేసింది.