తిరుగు ప్రయాణం

ఎస్‌.హనుమంతరావు
88978 15656

తిరుగు ప్రయాణం

భాగ్య నగరం నించి
తిరుగు ప్రయాణం...
జుమ్మెరాత్‌ బజార్‌లో
ఏంటిక్స్‌ పేరుతో దొంగ సొమ్ము సేకరించలేదు
ఘనీభవించిన పబ్లిక్‌ గార్డెన్స్‌ పచ్చిక మీది మంచుబిందువుల్లాంటి
మంచి ముత్యాలు కొనుగోలు చెయ్యలేదు
మొజాంజాహీ మార్కెట్‌ రాతి పందిరికి అల్లుకున్న పరిమళపు తీగెకి పూచిన
అత్తరు సీసాల జాజిమల్లెల్ని తెచ్చుకోవడం లేదు
మందు సంగతేమో గాని మంత్రంలా అనిపించే
సర్వరోగ నివారిణి జిందా తిలిస్మాత్‌ని
వెంట వుంచుకోలేదు
పెద్దల్ని పిల్లల్ని చేసే చాక్‌లెట్‌ టీని కొనలేదు
కరాచీ బిస్కట్లు, పుల్లారెడ్డి స్వీట్లు, దమ్‌ బిర్యానీ ...
ప్చ్‌!... వాటిపై ధ్యాసే పోలేదు

పిల్లల కోసం ఎగ్జిబిషన్‌లో
అంగార గ్రహపు మబ్బు లాంటి పీచు మిఠాయిని తీసుకోలేదు
సెక్యులరిస్టునే గాని 'రామ్‌ ప్యారీ' పాన్‌ ఇష్టం' దాన్ని కట్టించుకోలేదు...
తేనెటీగ తోట తోట తిరిగి
పూ తేనియని సేకరించినట్టు
పుస్తకాల సూపర్‌ మార్కెట్‌ ఆదివారం అబిడ్స్‌ ఫుట్‌పాత్‌ వరుసల్ని
చిక్కడపల్లి సుధా హౌటల్‌ పరిసరాల్ని
టెలిఫోన్‌ భవన్‌ బస్టాపుల్ని గాలించి గాలించి
కవితా సంపుటుల్ని కొనుక్కున్నాను
నా బ్యాక్‌ ప్యాక్‌లో సర్దుకున్నాను
ఇదే నా లగేజి
లెస్‌ లగేజి మోర్‌ కంఫర్ట్‌ అనుకుంటున్నారేమో
ఇది ఎంత తేలికో అంత బరువు
బతుకంత బరువు
గోదావరిలో బెర్త్‌ కన్ఫర్మ్‌
కాని కవిత్వముంటే ఇక నిద్రెలా పడుతుంది?