కొత్త ఫ్లాట్‌

 కథ

- దుర్గాప్రసాద్‌ - 9438293453

చంద్రం కాఫీ సేవిస్తూ, వార్తాపత్రిక తిరగేస్తూ కూర్చున్నాడు. ఆకాశం నల్లగా ఉంది. వర్షం బాగా రాకముందే బ్యాంకుకు చేరుకోగలిగితే మంచిది. కానీ ఇసుక, బురద బాగా ఉండడం వలన తడవక వెళ్లగలనో లేదో, అని అనిపిస్తున్నది!
ఇంతటిలోకి జానకి గాలి వానలాగా గదిలోకి ప్రవేశించింది. నుదిటిపై చెమట బిందువు చీర కొంగుతో తుడ్చుకుంటున్నది. ముఖం మీద కోపం యొక్క ముద్ర. ''ఇంకా ఎన్ని రోజులు పడుతుంది. ఫ్లాట్‌ తాళాలు చేతికి అందడానికి? కాస్త చెబుతారు? రోజుకు రోజు ఈ చాకిరీ చెయ్యలేక చస్తున్నాను ...''
''మళ్ళి ఏమిటయ్యింది ఈ రోజు?'' అడిగాడు చంద్రం.
''ఈ రోజు కూడా బయటకు వెళ్లలేము. అక్క, వాళ్ళ పెద్దనాన్నగారి అబ్బాయిని ఇంకా వదినని భోజనానికి ఆహ్వానించారు. బావగారు గుత్తి వంకాయ కూర కోసం వంకాయలు తేవడానికి మార్కెట్కి బయలుదేరారు!''.
''ఈ విషయం ఒక్కసారైనా ముందుగా నాకు ఎందుకు చెప్పలేదు?'' విసుగ్గా అడిగాడు చంద్రం.
చంద్రానికి విషయాన్ని అర్థం చేసుకోవడానికి ఎక్కువ సమయం పట్టలేదు. మొత్తం ప్లాన్‌ బూడిదలో పోసిన పన్నీరయ్యింది.
'' నిన్న, బావగారు, అక్క , వాళ్ళ పెద్దనాన్నగారి అబ్బాయి సోమేశ్వర్‌ రావుగారిని వాళ్ళ ఆవిడ్ని, ఇంకా లండన్లో పని చేస్తున్న వాళ్ళ అబ్బారు కష్ణను భోజనానికి పిలుద్దామని తమలో తాము చర్చించుకుండగా విన్నాను. నాతో ఒక మాట చెప్పాలని మీ వదినకి అన్నయ్యకి ఒక్క సారయినా అనిపించలేదు!''
'' మీకు తెలియనిది ఏముంది, అక్కకు, అసలే హై బ్లడ్‌ ప్రెషర్‌. వంటింటి ఛాయలకు కూడా ప్రవేశించడానికి వీలు లేదని డాక్టరుగారు మరి మరి చెప్పారు. నాకు వండి వార్చడంలో ఎటువంటి బాధ లేదు. నాకు కూడా చక్కగా ప్రతిదీ రుచిగా, శుచిగా వండి అందరికి పెట్టాలనే ఉంటుంది. కానీ, ఒక్క సారయినా నన్ను అడగకుండా అక్క,బావగారు 'టేక్‌ ఫర్‌ గ్రాంటెడ్‌' అయినప్పుడే, తల వేడెక్కుతుంది. కానీ ఏమి చేస్తాం ఉండేది వాళ్ళ ఇంటిలో!''.
మరింక ఓపిక, సహనం పని చెయ్యక పోవడంతో, చంద్రానికి కూడా, రోజుకు రోజు పిల్లల ద్వారా పెరుగుతున్న వత్తిడి వలన ఆఖరికి ఒక ఫ్లాట్‌ బుక్‌ చేసుకున్నాడు. ఒక ప్రక్క సంతోషంగా ఉన్నా, మనసులో అనేక సంశయాలు మెలుగుతున్నారు జానకికి!.
ఫ్లాట్‌ చూడడానికి ఈ రోజు భార్య భర్త కూడా కలిసి చూసి వద్దామని ప్లాన్‌ వేసుకున్నారు. పరిస్థితులు అనుకూలించక పోవడంతో ఫ్లాట్‌ చూడడానికి మరొక రోజు ప్లాన్‌ వేసుకున్నారు. చంద్రం కూతురు కీర్తన ఇప్పటికే చదువు పూర్తీ చేసి విప్రోలో ఉద్యోగం చేస్తున్నది. కొడుకు ప్రకాష్‌ కూడా ఇంజనీరింగ్‌ ఆఖరి సంవత్సరంలో ఉన్నాడు. కూతురికి పెళ్లి చేద్దామన్న సమయంలో కొత్త ఫ్లాట్‌ కొనడం గురించి ఆలోచించడం అంత సమంజసం కాదు. కానీ పిల్లలు పెద్ద వాళ్ళు అవడం వలన వాళ్ళ మాట కూడా కొట్టవేయలేక పోతున్నాడు చంద్రం!
కీర్తనకు ఎప్పుడు అసంతప్తిగా ఉండేది. తన ఫ్రెండ్స్‌ వలె తనకు ఒక సెపెరేట్‌ గది, తన గదిలో అందమైన పెయింటింగ్స్‌, తన బట్టలకు ఒక పెద్ద వార్డరోబ్‌ కలిగి
ఉండాలని తరచూ మొరాయించేది!.
ప్రకాష్‌ మొగ పిల్లాడు కావడంతో ఇవేమి పట్టించుకునే వాడు కాదు!
పెరుగుతున్న వయసు వలన అక్క,బావగారు తరచు అనారోగ్యానికి గురి కావడం, వాళ్ళను చూడడానికి ఇంటికి వచ్చిపోయే చుట్టాల వలన ఇల్లు ఎప్పుడు ఎవరో ఒక చుట్టంతో ఉండడం వలన పిల్లలు మాతో లేక, అక్క, బావగారితో గదిని సర్దుకుంటూ ఉండేవారు.
తరచు ఏదో ఒక కారణం వలన పిల్లలు ఇంకా చంద్రానికి మధ్య వాదనలు పెరిగిపోతూ ఉండేది. ఒక స్త్రీ, భార్య, తల్లిగా నేను మధ్యలో నలిగిపోతూ ఉండేదాన్ని.
తండ్రి పోవడం వలన అన్నయ్య వదిన తనను చదివించారు. బ్యాంకులో ఉద్యోగానికి తన నాలుగు గాజులు అమ్మి సెక్యూరిటీగా ఐదు వేలు వదినె చెల్లించింది. జానకిలాంటి మంచి అమ్మాయిని చూసి పెళ్లి చేయడమే కాకుండా, పిల్లల చదువులకు కావాల్సిన ఫీజులకు అయ్యే డబ్బుకూడా అడపా దడపా సర్దుబాటు చేస్తూనే ఉంటారు. చంద్రం తన అన్న, వదిన చేస్తున్న ఉపకారానికి, ప్రత్యుపకారంగా పెద్ద వయసులో తన అన్న వదినను వదిలి వెళ్ళలేను అని అనేక సార్లు పిల్లలకు స్పష్టం చేసారు. నాకు కూడా అక్కను, బావగారిని ఈ వయసులో వదిలి వెళ్లాలని లేదు.
ఈ మధ్య కీర్తనకు అసహనం బాగా పెరిగిపోయింది. అక్క బావగారి మాటలను అస్సలు లెఖ్ఖ చేయడం లేదు.
పై పెచ్చు జవాబు ఇవ్వడం మొదలుపెట్టింది.
ఆఖరికి ఎంతవరకు వచ్చిందంటే తానే స్వయంగా తన జీతం మీద ఫ్లాట్‌ బుక్‌ చేసుకోవడానికి నిర్ణయించుకుంది.
''కీర్తన చిన్న పిల్ల,పెళ్లి అయిపోయి అత్తారింటికి వెళిపోతే, బాధ్యతలు వలన అన్ని తానే తెలుసుకుంటుంది!'' బావగారు, అక్క ,తరచు కీర్తననే, వెనక వేసుకుని సమర్ధించేవారు.
జానకికి, తన స్వంత ఇంటిని అందంగా తీర్చిదిద్ది ప్రతి ఒక్కరినీ సంతోషంగా ఉంచాలనే కోరిక ఎల్లప్పుడూ
ఉండేది. తనకంటూ ఒక ఇల్లు అలాగే పిల్లలకు వీలుగా వాళ్లకు నచ్చిన విధానంలో వాళ్ళ గదులు అందంగా తీర్చి దిద్దాలనేది చాన్నాళ్ల కోరిక. తన సొంత కోరికలు, అభిరుచులు, ఆనందంతో జీవించడానికి ఎవరు మాత్రం ఇష్టపడరు. కొన్ని సార్లు పరిస్థితులు పరిమితించాలగా!
చేతిలో ఉన్న టవల్‌ తీసుకొని, స్నానానికి వెళ్ళే ముందు జానకికి హామీ ఇచ్చాడు. ''నేను ఈ రోజు బిల్డరుతో మాట్లాడతాను. బ్యాంకులో పెద్దగా పనిలేదు. వెంటనే అయిపోతుంది. షిఫ్ట్‌ ఎప్పుడు చేయవచ్చో చూడు. జాగర్తగా విను, మేము సాయంకాలం బయటికి వెళ్తాము అని మా వదినకు స్పష్టం చేసేరు!''
జానకి కాస్తంత ఊపిరి పీల్చుకుంది. చంద్రం చాలాసార్లు ఇట్లాంటి హామీలు చేయడం వాటిని తీర్చకపోవడం తనకు కొత్త ఏమి కాదు. కానీ ఈ రోజు బయటపడటం సాధ్యం కాదు. ఇప్పటికి నాలుగు వారాలు బట్టి కీర్తనకు కొత్త ఫ్లాట్‌ చూపిస్తానని హామీ ఇస్తున్నాడు చంద్రం.
ఒక పెద్ద నిటూర్పుతో దేముడా ''కీర్తన అర్థం చేసుకోవాలి''అని దండం పెట్టుకుంది''
చంద్రం, మెట్లు దిగుతుండగా జానకి అతని వైపు చూసింది. బావగారికి ''వంకాయలు, సేమియా పాయసానికి జీడీ పప్పు, కిస్మిస్‌ పళ్ళు ఇంకా ఏలకులు తెమ్మని చెప్పాను. అసలే మతిమరుపు మనిషి. ఇప్పుడు బావగారు ఏమిటి తెస్తారో చూడండి!''
''మరి ఉండలేను. ఉదయం బి.పి మాత్ర కూడా వేసుకోలేదు!'' అనుకుంటూ ఆప సోపాలు పడుతూ, అన్నపూర్ణగారు జుట్టు ముడి పెట్టుకుని, దేముడికి దీపం పెడుతూ వర్లిస్తున్నారు. ఈ రోజు వర్షం, పాలు ఆలస్యంగా రావడం వలన ఆమె అన్ని పనులు ఆగిపోయాయి.
''అక్క మీరు గదిలోకి వెళ్ళండి. టిఫిను, కాఫీ టేబుల్‌ మీద ఉంచాను. కాస్త విశ్రాంతి తీసుకోండి,'' చెప్పి, జానకి వంట పనిలో మునిగిపోయింది.
''మా సోమేశ్వరం అన్నయ్యకి పెద్దగా ఏమి అక్కర్లేదు, వంకాయ కొత్తిమీర కారం కాయలు పాళంగా, కొబ్బరికాయ మామిడికాయ పచ్చడి, ఆనపకాయ, మునకారు వేసి దప్పళం, కాస్తంత వేయించిన కందిపప్పు, చిన్న బెల్లం ముక్క,ఘుమ ఘుమ లాడే నెయ్యతో, తీపి కోసం సేమియా పాయసం, పొట్టు మినప పప్పు వడలు, మొన్న పెట్టిన కొత్త ఆవకారు కాస్తంత తీసి పెట్టు. వదినకు వేపడం ముక్కలు అంటే మహా ఇష్టం. కాస్త ఇంత బంగాళ దుంపలు ఉడికించి దోరగా వేయించు. పాపం కీర్తన, ప్రకాషుకు కూడా బంగాళ దుంపల వేపడం అంటే చాల ఇష్టం'' మెనూ మొత్తం అన్నపూర్ణగారు ఏకరువు పెట్టేసారు.
బావగారికి మంచి నీళ్లు అందించి, ఆయన చేతి నుంచి కూరల సంచి అందుకున్నాను.
వంట చేస్తూ కొత్త ఫ్లాట్‌ గురించి ఆలోచనలో పడిపోయింది జానకి.
''హాలులోకి పెద్ద టీ.వీ కొనాలి, కొత్త టీపారు, సోఫాలు తన పెళ్లికి వచ్చిన పింగాణి కప్పులు, ప్లేట్లు అమర్చడానికి చక్కటి గాజు అద్దాలతో కూడిన అల్మారీ అవి అమర్చాలి!''
''కీర్తన ఇంకా ప్రకాష్‌ గదిలో వేరే టీ.వీ, రెండు వేరువేరు మంచాలు, కర్లొన్‌ పరుపులు ఇంకా ప్రకాష్‌ లాప్‌ టాప్‌ కోసం కంప్యూటర్‌ టేబుల్‌, అలాగే కీర్తన ఆఫీసుకు వెళ్ళడానికి కొనుక్కుంటున్న డ్రెస్సులు అన్ని అమరేలా ఒక పెద్ద బీరువా కొనాలి. ఇక్కడైతే పాపం నా బీరువాలోనే తన బట్టలు పెట్టుకుంటున్నది. ప్రకాష్‌ కూడా బావగారి టేబుల్‌ మీద కూర్చొని తన లాప్టాప్లో అన్ని పనులు చేసుకుంటున్నాడు!''.
''బాల్కనీలో మొత్తం పూల మొక్కలు ఇంకా అందమైన క్రోటన్స్ని పెంచేలా చేస్తాను''!
''చంద్రానికి కాస్తంత శుభ్రం కూడా లేదు. స్నానం చేసి వచ్చి ఎక్కడ పడితే అక్కడ తువ్వాలు పడేస్తాడు. అతని గురించి ఒక బట్టలు స్టాండ్‌ కొనాలి!''
ఆలోచనలలో ఉండగానే మొత్తం వంట పూర్తి కావచ్చింది.
కీర్తనకూడా ఆఫీసునుంచి మొదటి షిఫ్ట్‌ పూర్తి చేసుకుని ఇంటిలోకి అడుగు పెట్టింది.
మెల్లంగ వండిన వంటలను వేరే పాత్రలలోకి మార్చేసరికల్లా దాదాపు మధ్యాహ్నం ఒంటి గంటన్నార అయ్యింది.
ఇంతటిలోకి టాటా హెక్స కారు ఇంటి ముందర ఆగింది. లోపలినుంచి సోమేశ్వరరావు గారు అతని భార్య మీనాక్షి గారు, దాదాపు ఇరవై ఏడు సంవత్సరాల వయసుగల వాళ్ళ అబ్బారు కష్ణ లోపలినుంచి ఒక స్వీట్‌ పాకెట్తో ఇంటి ముందర దిగారు. అక్క, బావగారు వాళ్ళని సాదరంగా ఇంటిలోకి ఆహ్వానించారు.
''మాకు ఎలాగూ పిల్లలు లేరు. మా చంద్రం పిల్లలే మా పిల్లలు!''.
''పేరుకు జానకి నా తోడికోడలు కానీ నా తోబోట్టువు కన్నా నన్ను ఎక్కువగా చూసుకుంటుంది!''.
''నా వంటి మీద ఉన్న పాతిక తులాల బంగారం మా కీర్తనదే. ఇంకా నీకు కట్నాలు కానుకులు కావలిస్తే, నా పసుపు కుంకం కింద మా నాన్న రాసి ఇచ్చిన మూడు ఎకరాల పొలం మీ అబ్బారు కష్ణ పేరు మీద రేపే రాసిస్తాను!''.
''మీ బావగారు కీర్తన పేరు మీద దాదాపు ఐదు లక్షలు వుంచారు అవి పెళ్లి ఖర్చులకు పనికొస్తాయి !''.
''చంద్రం కొడుకు ప్రకాష్‌ చిన్నవాడు, కీర్తన పెళ్లి తరువాత, ఇంటిమీద, వాడి కోసం రెండు గదులు వేయిస్తాను!''.
''పాపం చంద్రం పిల్లలు ఎంత అవస్థ పడ్తున్నా పల్లెతు మాట అనరు. అంతా మా జానకి పెంపకం అని ఏకరువు పెడ్తున్నది అన్నపూర్ణగారు !''
''మేము మాత్రం కట్నాలు తీసుకుని ఏమి చేసుకుంటాం. మా ఒక్క అమ్మాయి పెళ్లి అయిపోయింది. ఇంకా అబ్బాయికి పెళ్లి చేసేస్తే పని అయిపోతుంది'' అంటున్నారు మీనాక్షిగారు!
''మీ అన్యోన్యతను చూసాక, ఇలాంటి ఇంటినుంచి అమ్మాయిని చేసుకుంటే మాకు కూడా కలిసి వస్తుందని ఆలోచించే నేను మీ వదిన ఒక నిర్ణయానికి వచ్చాం, చేసుకుంటే మీ కీర్తనను మా ఇంటి కోడలిగా చేసుకుందామని. మరి మీ కీర్తన, చంద్రానికి మా సంబంధం ఇష్టమేనా?'' అని అడుగుతున్నారు సోమేశ్వరరావు గారు!.
తలుపుచాటు నుంచుని వింటున్న కీర్తన కళ్ళల్లోనుంచి ఒక్కసారిగా అశ్రు ధార, జలపాతంలాగా కారుతున్నది .
చీర మొత్తం చెమటతో మునిగిపోవడంతో, స్నానం చేసుకుని బెంగాలీ కాటన్‌ చీర కట్టుకుని బయటకు వస్తుండగా కీర్తన ఏడుపు చూసి ఏమిటి అయ్యిందని ఒక్కసారిగా దగ్గరకు చేరాను. చిన్నంగా అక్క ఇంకా బావగారు మాట్లాడుతున్న మాటలు వినిపిస్తున్నాయి.
చాటునుంచి విన్న మాటలకూ మనసు మొత్తం వికలమైపోయింది.
దాదాపు ఆరుగురు మనుషులలో ఉంటున్న ఇంటిలో నలుగురు తన వాళ్లే, మిగిలిన ఇద్దరు గురించి ఒక్కసారి ఆయినా తాను ఎందుకు ఆలోచించ లేకపోయింది. పిల్లల స్వార్థంలో పడి తాను కూడా మంచి - చెడ్డ ఆలోచించ లేకపోయిందా? అని ఒక్కసారిగా తనను తానే అసహ్యించుకుంది!
''తినేది గుప్పెడు మెతుకులు తాగేది గ్లాసుడు మంచి నీళ్లు!''.
''వీటి గురించి ఇంత తాపత్రయమా?''
ఇలాంటి ఆప్యాయత అనురాగం పంచుతున్న వాళ్ళను వదిలేసి తాను ఏర్పర్చుకుందాం అన్న ప్రపంచంలో ఏమి సుఖపడతాను అని ఒక్కసారిగా నిట్టూర్చి, మొహం తుడుచుకుని హాల్లో వాళ్ళని పలకరించడానికి బయల్దేరింది జానకి!.
అందరిని సాదరంగా భోజనానికి ఆహ్వానించింది!.
అన్నపూర్ణ గారు ప్రతి వంటను పొగుడుతూ మా జానకి చేతి వంటలో అమతం ఉంది అంటూ ప్రతిదీ చాలా ఆప్యాయంగా వడ్డిస్తున్నారు.
మీనాక్షిగారు ఇంకా వాళ్ళ అబ్బారు కష్ణ కూడా ఎంతో తప్తిగా తింటున్నారు.
అన్నపూర్ణ గారు, నాకు అమ్మాయిని ముస్తాబు చేసి తీసుకు రమ్మని కన్ను సైగలతో సూచించారు.
వెంటనే నేను కీర్తనను ముస్తాబు చెయ్యడానికి లోపలికి బయల్దేరాను.
కీర్తన ఎవరు ఏమిటిఅని ప్రశ్నల వర్షం కురిపించేస్తున్నాది.
అబ్బారు ఎలాగా ఉన్నాడు అని అడిగాను? ఒక్కసారిగా సిగ్గుపడుతూ స్నానాల గదిలోకి బయల్దేరింది.
మెల్లంగ అమ్మాయిని చక్కగా ముస్తాబు చేసి వాళ్ళ ముందర తీసుకు వచ్చాను.
అమ్మాయి ఇంకా అబ్బారు కాసేపు ఏకాంతంగా మాట్లాడుకున్నారు.
ఇద్దరు ఆనందంతో నవ్వుతు బయటికి వచ్చారు
''మాకు పెద్దగా జాతకాలూ పట్టింపు లేవు. మీకు ఏమైనా ఉంటె నేను మా కష్ణ జన్మ తేదీ, నక్షత్రం అవి రాసిస్తాను!'' అని సోమేశ్వరరావు గారు, బావగారుతో చెప్తున్నారు.
''మాకు, అబ్బాయికి మీ అమ్మాయి నచ్చినట్లే, మీరుకూడా ఒకసారి మా ఇంటికి వస్తే, ముహర్తం విషయాలు అవి మాట్లాడుకోవచ్చు!'' అని మీనాక్షిగారు అక్కయ్యకు చెప్తున్నారు.
ఇంత సంతోషమైన వార్త వినగానే ఒక్కసారిగా నా
కాళ్ళు చేతులు ఆడడం మానేశాయి.
''మేము మరి బయల్దేరుతాము'' అని చెప్పడం మొదలెట్టారు మీనాక్షిగారు.
వెంటనే మా తోడికోడలు తన బీరువా నుంచి కొత్త చీర, రవిక, దేముడు దగ్గర పెట్టిన అరటిపళ్ళు తీసి బొట్టుపెట్టి మీనాక్షిగారికి అందించింది.
అందరం కలిసి వీధివరకు వాళ్ళను సాగనంపాము.
ఇంటిలోకి రాగానే ఒక్కసారిగా అక్కయ్యను పట్టుకుని బావురుమంది కీర్తన!
''పిచ్చి పిల్ల, పెళ్లి అనగానే అప్పుడే మనం పరాయి వాళ్ళం అయినట్లు బాధ పడిపోతున్నాది!'' జానకి అమ్మాయికి కాస్త దిష్టి తియ్యు అని పురమాయించింది.
''నాకు బాగా అలసటగా ఉంది, కాస్త బిపి టాబ్లెట్‌ వేసుకుని పడుకుంటాను'' చెప్పి అక్క తన గదిలోకి బయల్దేరింది.
వంటిల్లు సర్దుకుని, టీ కలుపుకుని నేను కీర్తన పెళ్లి ముచ్చట్లు మొదలెట్టాం.
కీర్తన ఆనందానికి అవధులులేవు.
గేట్‌ తలుపు చప్పుడు కావడంతో, గేట్‌ తియ్యడానికి బయల్దేరాను.
లోపలికి వస్తూ, చంద్రం చెప్పడం మొదలెట్టారు ''బిల్డరుతో మాట్లాడేసాను, మరొక్క నెల, పదిహేను రోజులలలో మన ఫ్లాట్‌ మనకు అప్పచెప్తాడు. నువ్వు మనకు కావాల్సిన సామాన్లు లిస్ట్‌ రాయు. కన్స్యూమర్‌ లోన్‌ ద్వారా అన్ని ఒకేసారి కొనేద్దాం!''.
మంచి నీళ్లు అందిస్త్తూ కీర్తన మొదలుపెట్టింది ''మీకు కావలిస్తే మీరు, అమ్మ, తమ్ముడు కలిసి కొత్త ఫ్లాట్‌ లో
ఉండండి. నేను పెద్దనాన్నను, పెద్దమ్మను ఇంకా ఈ ఇల్లు వదిలి ఎక్కడికి వెళ్ళేది లేదు!''.
''నిజామా?'' అని నోట్లో వేలుబెట్టి ఆనందంగా అడుగుతున్నాడు చంద్రం.
''చంద్రం, బోలెడు అంత పని ఉంది. శాస్త్రులు గారి దగ్గరకు వెళ్లి అబ్బారు, అమ్మాయి జాతకాలూ చూపించి త్వరగా ముహర్తలు పెట్టించాలి''. కాఫీ తాగి త్వరగా బయల్దేరు అని హడావిడి చెయ్యడం మొదలుపెట్టారు బావగారు.
కీర్తనలో వచ్చిన మార్పుకు చంద్రం ఆనందానికి అవధులు లేవు.
''నిజమే ! మేఘాలు జీవితంలో తేలుతూ వస్తాయి,
వర్షం లేదా తుఫానును మోయడానికి కాదు,
సూర్యాస్తమయం ఆకాశానికి రంగును జోడించడానికి!''.