బహుముఖ ప్రజ్ఞాశాలి మల్లాది

చెరుకూరి సృజన
98486 64587

మద్రాసు పాండీబజార్‌లో ఒక పాత పుస్తకాల షాపులో నీరు కాయి పంచె, చొక్కా వేసుకున్న ఒక పెద్దాయన ఇంగ్లీషు పుస్తకాలు తిరగేస్తుంటే.. 'ఏమయ్యా ఆ ఇంగ్లీషులో పుస్తకాలు తిరగేస్తా వెందుకు? అవి నీకేం అర్ధమౌతాయి?' అంటే ఆ పెద్ద మనిషి నవ్వి తనకు కావాల్సిన పుస్తకాలు తీసుకొని వెళ్ళిపోయాడు. పి.వి. నర్సింహారావుకి 14 భాషలు, బూర్గుల రామకృష్ణరావుకి 8 భాషలు వచ్చునని గొప్పగా చెప్పుకుంటారు. రాహుల్‌ సాంకృత్యా యన్‌కు అనేక విదేశీ భాషలు వచ్చని తెలుసుకొని ఇంకా ఆశ్చర్యపోతాం. కాని అన్ని భారతీయ భాషలతో పాటు జర్మన్‌, ఇటాలియన్‌, నేపాలీ, గ్రీక్‌, ఫ్రెంచ్‌, బర్మీస్‌, చైనీస్‌, జపనీస్‌ లాటి మొత్తం 50కి పైగా భాషలపై పట్టు కలిగిన వ్యక్తి మన తెలుగువాడై ఉన్నాడు. ఆ పుస్తకాల షాపు నుంచి నవ్వుతూ వెళ్లినదే ఆ బహుముఖ ప్రజ్ఞాశాలి.. పేరు మల్లాది రామకృష్ణ శాస్త్రి. తాళపత్రాలపై తనకు వచ్చిన భాషలన్నిటితోనూ సంతకం చేసి ఇవ్వమని ఒకసారి ఆరుద్ర అభ్యర్ధించగా అలాగే తనకు వచ్చిన అన్ని భాషల్లోనూ సంతకం చేసి ఇచ్చాడట. ఇంకా కొన్ని భాషలు మిగిలి ఉండగానే ఆరుద్ర తెచ్చిన తాళపత్రాలు అయిపోయాయట.గూడవల్లి రామబ్రహ్మం గారు 'పల్నాటి యుద్ధం' చిత్ర రచనకు సంబంధించి మల్లాది గారి సలహాల కోసం ఈయన్ని 1945లో మద్రాసుకు ఆహ్వానించారట. ఆ తర్వాత వివిధ సినిమాల్లో సుమారు 200 పాటలు తన పేరిట రాశాడు. 1952లో 'చిన్న కోడలు'తో ప్రారంభమై 1968లో 'వీరాంజనేయ' వరకు 39 చిత్రాలకు పాటలు రాశారు. తన పేరు మీద అని ఎందుకు రాయాల్సి వచ్చిందంటే మల్లాది గారు సీనియర్‌ సముద్రాల గారికి ఘోస్ట్‌ రైటర్‌ అనే విషయం సినిమా రంగంలో ఒక బహిరంగ రహస్యం. ఆ విషయమే ఎవరో సముద్రాల గారిని అడిగితే 'ఇందులో తప్పేముంది నాకు సమయం లేదు, మల్లాది గారికి డబ్బు లేదు' అని సమాధానమిచ్చాడట. అయితే ఈ విషయం ఎప్పుడూ మల్లాది గారు తన నోటితో చెప్పలేదు. దేవదాసు పాటలు ఆయనే రాశారని కొందరు అంటున్నా- ఆయనెప్పుడూ ఆ విషయం ప్రస్తావించలేదు. 1934 నుంచే కృష్ణా పత్రికలో చాలా సాహిత్య వ్యాసాలు రాశారు. అనేక నాటకాలు, కథలు రాశారు. ఆయన రచనలు 4 సంపుటాలుగా వెలువడ్డాయి. 'డుమువులు' అనే కథ 14 భారతీయ భాషల్లోకి అనువాదమైంది.
మల్లాది గారికి అనేక భాషల్లో పాండిత్యం ఉండటమే గాక జ్యోతిష, ఖగోళ, తర్క, న్యాయ, అలంకార, వ్యాకరణ, వేదాంత, నాట్య, సంగీత శాస్త్రాల్లో సాధికారికమైన ప్రవేశం ఉంది. ఆనాటి అగ్రశ్రేణి సాహిత్య పత్రిక భారతిలో అనేక విమర్శనా వ్యాసాలు రాశారు. కథలతో పాటు కృష్ణాతీరం, తేజోమూర్తులు, బాల, గోపిదేవి, కేశీ గోపాలం, సేఫ్టీ రేజర్‌ అనే నవలలు, చలవ మిరియాలు పేరుతో ఒక శీర్షిక నిర్వహించారు. సువర్ణ సుందరి, చివరకు మిగిలేది, విప్రనారాయణ, శ్రీకృష్ణ రాయబారం వంటి సినిమాలు ఈయన రచనలే. సముద్రాల గారితో కలిసి రత్నమాల, మనదేశం, లైలా - మజ్ను, స్వప్న సుందరి, బాలరాజు కథ లాటి చిత్రాలకు రచనా సహాయం చేశారు. 'మేడలోని అలపైడి బొమ్మ', 'ఏమో తటిల్లత మేమెరుపు' లాటి పదాలు మల్లాదికి తప్ప ఎవరికి పడతాయి? 'కుడి ఎడమైతే పొరపాటు లేదోరు' పాటకు అర్థమేమిటని ఎవరో అడిగితే తాగుబోతోడి మాటలకు అర్థాలేమిటండీ? అన్నాడట.
మల్లాది గారు 1965 సెప్టెంబరు 12న చనిపోయినప్పుడు అనేక మంది ప్రముఖులు ఆయనకు నివాళులు అర్పించారు. తాపీ ధర్మారావు గారు 'సినిమా పాటలకు కావ్య గౌరవం కల్పించిన మహాకవి మల్లాది' అన్నారు. ఇదే అభిప్రాయాన్ని శ్రీ శ్రీ కూడా వెలిబుచ్చగా, ఆయన శైలిలో అమృతాలు లొలికాడు అని దాశరధి అన్నారు. ఇంత గొప్ప విద్వత్తు ఉన్న వ్యక్తి మరోచోట ఇంకొంత విఖ్యాతుడయ్యే వాడు. ఎవరో అన్నట్లు 'మల్లాది గారు తెలుగువాడవ్వటం మన అదృష్టం, ఆయన దురదృష్టం'.
(సెప్టెంబర్‌ 12 : మల్లాది రామకృష్ణ శాస్త్రి 56వ వర్ధంతి)