ఆర్‌ఆర్‌ఆర్‌ సినిమాలో అ నేక అంతర్జాతీయ పురస్కారాలు పొందడం, నాటు నాటు పాట అత్యున్నతమైన ఆస్కార్‌ ఎంపికల జాబితాలో చోటు సంపాదించడం అసాధారణ విషయమే! దాంతో తెలుగు సినిమా ప్రపంచ స్థాయికి చేరిందనే ఉత్సాహం పరవళ్లు తొక్కుతున్నది. చంద్రబోస్‌ రాసిన ఆ పాట జానపద శైలిలో వుండటం బ్రిటిష్‌ దురహంకారాన్ని ప్రశ్నించడం వల్లనే ఒరిజినల్‌ క్యాటగిరీలో విజయం సాధించింది. ఆస్కార్‌ కొలబద్దలు, అనుభవాలు అనేకం వున్నా ఇందులోని సందేశం స్పష్టమే! ప్రశ్నించడం, ప్రతిఘటించడం సారాంశంగా మన్నన పొందింది. ఈ విస్తృత కోణాలను విస్మరించి కేవలం గ్లామర్‌, డాన్స్‌ పరిమితుల్లోనే పరిశీలిస్తే సరైన అవగాహనకు రాలేము. ఆ చిత్రం అల్లూరి సీతారామరాజు, కొమరం భీమ్‌ పాత్రల ఛాయల్లో రూపొందినా ... కథనం ఊహాజనితమైందే. సీతారామరాజును రామావతారంలా చూపించడంపైనా విమర్శలు వచ్చాయి. తెలుగులోనూ ప్రతిభావంతులైన దర్శకులు, సామాజిక న్యాయం కోరేవారు కూడా ఈ ఆకర్షణతో అటు నడుస్తున్న సంకేతాలున్నాయి. వేల కోట్ల లెక్కల్లోకి చేరుతున్న సినిమా ఖర్చులు కార్పొరేట్‌ శక్తుల చేతుల్లో దాన్ని బందీని చేస్తున్నాయి. ఆర్‌ఆర్‌ఆర్‌ సృష్టికర్తల నుంచే ఇప్పుడు ఆరెస్సెస్‌ కథను ముందుకు తేవడం యాదృచ్ఛికం కాదు. ఆ సినీ రచయిత ఈలోగా రాజ్యసభ పదవి పొండడం వెనక ఈ కారణాలు లేకుండానూ పోవు. మొదటి నుంచి ప్రగతిశీలతకూ, మానవీయ విలువలకూ మత సామరస్యానికి పట్టం కట్టిన తెలుగు సినిమా మత విభజన వైపు నడిస్తే అంతకన్నా విచారకరమైంది వుండదు.
కాశ్మీర్‌ ఫైల్స్‌తో సహా హిందీ తదితరó భాషల్లో మతతత్వ రాజకీయ ప్రచారం పెరిగిపోవడంపై పరిశీలకులు ఆందోళన చెందుతున్న సందర్భంలోనే, షారుఖ్‌ఖాన్‌ నటించిన పఠాన్‌ సినిమా అఖండ విజయం ఒకింత ఉపశమనం కలిగించక మానదు. కథలూ నటీనటులను బట్టి ఇటీవలి కాలంలో బాయకాట్‌లూ, బహిష్కరణలూ, విద్వేష ప్రచారాలూ బాలివుడ్‌ను కలుషితం చేశాయి. అలాటి బహిష్కరణ పిలుపులనే బహిష్కరించి పఠాన్‌ను ప్రజలు ఆదరించారు. అది కూడా ఫార్ములా చిత్రమే అయినా, ప్రస్తుత కలుషిత విద్వేష వాతావరణంలో ఇది ఉపశమనమే. అది కూడా సామాన్య ప్రేక్షక మహాశయులు ఇచ్చిన సందేశం. మదర్‌ ఇండియా లేదా భారత మాతకు కుల మత జాతి భేదాలు లేవని మనమంతా ఒక్కటేనని చెప్పే సందేశం. విభేదాల ఆధారంగా విషబీజాలు నాటాలని వినాశకర పథకాలు పన్నే విద్వేష శక్తుల పథకాలకు విరుగుడు ఇదే. లాభాల కోసమో, పెత్తనాలకు భయపడో ప్రజల మధ్య గోడలు కట్టడం కళాకారులు చేయవలసిన పని ఎంత మాత్రం కాదు. చెట్టపట్టాల్‌ పట్టుకుని దేశస్తులందరు నడవవలెనోరు అన్న గురజాడ మాటే మన బాట కావాలి.