అన్నవరం దేవేందర్‌ కవితా సంకలనాల ఆవిష్కరణ

పుస్తకావిష్కరణ చేస్తున్న ఆచార్య ఎన్‌ గోపి,
పక్కన కవి అన్నవరం దేవేందర్‌ తదితరులు

అన్నవరం దేవేందర్‌ వర్తమాన తెలుగు సాహిత్యనికి ప్రాతినిధ్య కవి అని కేంద్ర సాహిత్య అకాడమీ పురస్కార గ్రహీత తెలుగు విశ్వవిద్యాలయం పూర్వ వైస్‌ ఛాన్సలర్‌ ఆచార్య ఎన్‌ గోపి అన్నారు. అక్టోబర్‌ 16 2022 ఆదివారం కరీంనగర్‌లో 'అన్నవరం దేవేందర్‌ కవిత్వం 1988 - 2022 (పన్నెండు గ్రంథాల రెండు బహత్‌ సంకలనాలు) ఆవిష్కరించారు. దేవేందర్‌ మూడు దశాబ్దాలుగా అలుపెరుగక నిరంతరం రాస్తున్న కవి అన్నారు. సమావేశానికి కేంద్ర సాహిత్య అకాడమీ అనువాద పురస్కార గ్రహీత డాక్టర్‌ నలిమెల భాస్కర్‌ అధ్యక్షత వహించారు. తెలంగాణ మీడియా అకాడమీ చైర్మన్‌ అల్లం నారాయణ మాట్లాడుతూ, దేవేందర్‌ తెలుగు నేల మీది అన్ని ఉద్యమాలను కవిత్వీకరించారని అన్నారు. జర్నలిస్టుగా ప్రారంభమై కవిగా ప్రతిష్ట పొందుతున్నాడని అన్నారు. డాక్టర్‌ సంకిరెడ్డి నారాయణరెడ్డి మాట్లాడుతూ దేవేందర్‌ కవిత్వంలో తెలంగాణ ఉద్యమ చరిత్ర సారం నిలిచి ఉందన్నారు. ఫిలిం భవన్‌ సభా ప్రాంగణానికి నిజాం వెంకటేశం పేరు పెట్టారు. సభా వేదికకు అన్నవరం దశరథం 82వ జయంతి వేదికని నామకరణం చేశారు. సమావేశంలో తంగేడు పక్షపత్రిక సహా సంపాదకుడు డాక్టర్‌ కాంచనపల్లి మాట్లాడుతూ దేవేందర్‌ తెలంగాణ భాషను ప్రేమించిన కవి అన్నారు. అఖిల భారత తెలంగాణ రచయితల వేదిక అధ్యక్షుడు జూకంటి జగన్నాథం మాట్లాడుతూ ప్రజల అస్తిత్వ ఆవేదనే అన్నవరం కవిత్వం అన్నారు. సమావేశంలో ప్రజాస్వామిక రచయిత్రుల వేదిక జాతీయ అధ్యక్షులు అనిశెట్టి రజిత, కరీంనగర్‌ అడిషనల్‌ కలెక్టర్‌, కవి గాజుల శ్యాం ప్రసాద్‌ లాల్‌, ప్రఖ్యాత విమర్శకులు ఉస్మానియా విశ్వవిద్యాలయం ఆచార్యులు డాక్టర్‌ ఎస్‌.రఘు, శ్రీరామ్‌, ఎం నారాయణ శర్మ, బూర్ల వెంకటేశ్వర్లు, తెలంగాణ రచయితల వేదిక రాష్ట్ర అధ్యక్షులు గాజోజు నాగభూషణం, జిల్లా అధ్యక్షుడు కందుకూరి అంజయ్య, గులాబీల మల్లారెడ్డి, కూకట్ల తిరుపతి, సివికుమార్‌ తదితరులు పాల్గొన్నారు. చాలా రోజుల తర్వాత కరీంనగర్లో కిక్కిరిసిపోయిన ఈ సమావేశానికి హైదరాబాద్‌ సిద్దిపేట, హుస్నాబాద్‌, మంచిర్యాల, లక్షెట్టిపేట, పరకాల హనుమకొండ, హుజురాబాద్‌, జగిత్యాల ప్రాంతాల నుంచి కవులు రచయితలు వచ్చారు.