పదపద పదపద పోరుముందుకు

కవి: 

పి.ఎన్‌.మూర్తి

సెల్ : 

7382842823

కాలం కదలిక ఆగదు - లోకం మారకతప్పదు

మనిషే మారకపోతే - మనుగడ ముందుకు సాగదు

ఈ వైనం ఈ గమనం మార్చేటందుకు

పదపద పదపద పోరు ముందుకు

ఆకూ అలములు మేసిన మనిషి - పరుల దోపిడి ఎరుగని మనిషి

నేడిందు పసందుల వినోదమందున - మునిగి తేలుతూ కొందరుండగా

పూట గడవక ఎందరో పస్తులపడి చస్తున్నారు

ఈ వైనం ఈ గమనం మార్చేటందుకు - పదపద పదపద పోరు ముందుకు

ఆత్మీయతలతో అనురాగాలతో కల్లాకపటం కానని మనిషి

నేడింద్ర భవంతుల విలాసమందున - విర్రవీగుతూ కులుకుతుండగా

నీడేకరువై ఎందరో - జీవచ్చవమై వున్నారు

ఈ వైనం ఈ గమనం మార్చేటందుకు - పదపద పదపద పోరు ముందుకు

పల్లెసీమలో చేతివృత్తులతో కళకళలాడిన స్వేచ్ఛామనిషి

తరతరములకు తరగని ఆస్తులు - కూడబెట్టుకొని కొందరుండగా

ఉన్నభూమినే అమ్ముకొని - అప్పుల నిప్పులా వేగుతున్నారు

ఈ వైనం ఈ గమనం మార్చేటందుకు - పదపద పదపద పోరుముందుకు

ప్రకృతి నియమం పరిశోధించి - ప్రగతి పధమున నిలిచెను మనిషి

నేడా ప్రగతి ఫలంబులు తేరగమెక్కిన - పాలక పంచన కొందరుండగా

చేసిన కష్టం చేతికందక - అర్ధాకలితో నలుగుతున్నరు

ఈవైనం ఈ గమనం మార్చేటందుకు పదపద పదపద పోరుముందుకు

అమ్మేదైవం అమ్మేగురువని - ఆరాధించిన మానవుడు

నేడాయమ్మకు రంగులుపూసి అంగడిలోన బొమ్మనుచేసి

వావి వరసలె విడిచిన నరుడు - మధమ్‌ హెచ్చి మృగమైనాడు

ఈవైనం ఈగమనం మార్చేటందుకు - పదపద పదపద పోరుముందుకు