కెంగార మోహన్‌
94933 75447
వరండాలో విరిగి కట్లుకట్టిన పడక్కుర్చీ మీద పడుకుని ఏదో ఆలోచిస్తూ కూర్చుని ఉన్నాడు ఈశ్వరప్ప. మనసు విరిగి బతుకు కకావికలమై బతుకుతున్నోడికి ఈ పడక్కుర్చీకున్న కట్లొకలెక్కా! నీతిగా బతుకుతున్నోడు. సహకార శాఖలో ఈశ్వరప్ప నిజాయితీని అధికార్లెవరూ జీర్ణించుకునేవారు కాదు. సహకార శాఖ పరిధిలో నడపబడుతున్న సహకార బ్యాంకు ద్వారా నడిచే సహకార సొసైటీకి కార్యదర్శి ఈశ్వరప్ప. ఆ సొసైటీ అధ్యక్షుడు రాజకీయంగా పలుకుబడి ఉన్నవాడు. అదే ఊరిలో ఉన్న ఓ నాయకుడు రాష్ట్ర రాజకీయాల్లోనే క్రియాశీలకమైన వ్యక్తి. ఆ నాయకుడి అనుచరుడే సొసైటీ అధ్యక్షుడు. అతడు చెప్పిందే అక్కడ అమలయ్యేది. ప్రభుత్వం నుండి సహకార బ్యాంకు ద్వారా వచ్చే సబ్సిడీ రుణాలు అర్హత లేని వారికి కూడా ఇవ్వమని సొసైటీ అధ్యక్షులు చెప్తుంటాడు.
సొసైటీ కార్యదర్శి ఈశ్వరప్ప చాలాసార్లు ''సార్‌ నిబంధనలకు విరుద్ధంగా నేను పనిచేయలేను. అర్హులైన వారికే సబ్సిడీ రుణాలు ఇవ్వాలి. రైతులకందించే ఏ సబ్సిడీ రుణాలైనా, సంక్షేమమైనా నిజాయితీగా లబ్ధిదారులకు ఇచ్చేందుకే నన్ను నియమించారు. నా విధులకు ఇలా ఇబ్బంది కలిగించవద్దు.'' అని సొసైటీ అధ్యక్షుడిని ఎన్నోసార్లు వేడుకున్నా ప్రయోజనం లేదు.
అతడు చెప్పిన మాట వినడం లేదనే అక్కసుతో సొసైటీ అధ్యక్షుడు ఈశ్వరప్పను చాలాసార్లు తిట్టిన సందర్భాలు కూడా ఉన్నాయి. అలా తిట్లు పడటానికీ కారణముంది. కార్యదర్శి అంటే పెయిడ్‌ సెక్రెటరీ. అతను వేతనాలు తీసుకోవాల్సింది కూడా సొసైటీ ద్వారానే. అదీ సొసైటీ అధ్యక్షుడి సంతకం తోనే.. కాబట్టి ఎన్నిసార్లు కులం పేరుతో గద్దించినా ఈ కార్యదర్శి మాత్రం నోరు మెదపడు. ఖరీఫ్‌ సీజన్‌లో సహకార బ్యాంకు అనేక సబ్సిడీ పథకాలు ఇస్తుంది. ఆ లబ్దిదారుల జాబితా ఆ పెద్ద మనిషి సూచనతో అధ్యక్షుడు ఈశ్వరప్పకు పంపిస్తాడు. ఆయనిచ్చిన జాబితాకనుగుణంగానే ఇవ్వాలి. అసలు ఆ ఊళ్ళో సొసైటీ పుట్టినప్పటి నుంచి ఆ పెద్ద మనిషి కుటుంబం నుంచి లేదా ఆయన సూచించిన వాళ్ళే అధ్యక్షులుగా ఉంటున్నారు.
ఈశ్వరప్ప చిన్పప్పటి నుంచి పుస్తకాలు బాగా చదివేటోడు. సమాజం గూర్చి బాగా అవగాహన చేసుకున్నోడు. ఏదో ఒకటి సమాజానికి మేలు చేయాలని కలలు కనేవోడు. ఉన్న జీతంలోనే పిల్లల్ని బాగా చదివించాడు. కూతురు టీచరైంది. మరొక కూతురు, కొడుకు పెళ్ళీడుకొచ్చారు. పనిచేసిన ప్రతి చోటా నిజాయితీగా ఉండటం వల్ల అతన్ని ఏదో ఒక కారణంతో బదిలీ చేస్తారు. పెయిడ్‌ సెక్రటరీకి బదిలీలుండవు. కానీ ఈశ్వరప్పను రాజకీయ పలుకుబడితో అతన్ని వేరే ఊళ్ళకు బదిలీ చేస్తుంటారు. ఈశ్వరప్ప నిజాయితే బదిలీకి కారణమౌతుంది.
ఙఙఙ
తెలతెలవారుతోంది. అక్కడక్కడా టీ కొట్లు తెరుచుకున్నాయి. 5 గంటలకే రిపోర్టు చేయమనడంతో శ్రీనివాసులు ఏసిబి కార్యా లయానికి చేరుకున్నాడు. బహుశా పెద్ద అవినీతి పరున్నెవరినో పట్టుకునేందుకే వల పన్నుతుండవచ్చు. ఎవరి టీంవాళ్ళు వాళ్ళ వాళ్ళ వాహనాల్లో ఎక్కారు. శ్రీనివాసులు టీం నెంబర్‌ ఒకటి. శ్రీనివాసులు డీయస్పీ టీం సభ్యుడు కాబట్టి డీయస్పీ గారు కారు ఎక్కిన వెంటనే నిర్దేశించిన ముగ్గురూ ఎక్కేశారు. కారుకున్న పోలీస్‌ బోర్డు తీసి పక్కన బెట్టారు. సిఐ కారు నడుపుతున్నారు. సిటీలో కొద్దిదూరం వెళ్ళాక డీయస్పీ టీ తాగుదామన్నాడు. ఒక టీకొట్టు ఉన్నచోట ఆపి టీ ఆర్డర్‌ చేశారు. అందరూ మఫ్టీలోనే ఉన్నారు. టీ డబ్బులు చెల్లించి కారు కదిలించి నగరం అవుట్‌ స్కర్ట్స్‌కు వెళ్ళి ఒకచోట ఆపుకున్నారు. డీయస్పీ ఎవరితోనో ఫోన్‌లో మాట్లాడుతూనే ఉన్నారు.
''సార్‌.. న్యూస్‌ పేపర్‌ కుర్రాడు పేపర్‌ విసరేసి వెళ్ళాడు. గేటు తీయలేదు'' అని డీయస్పీకి ఫోన్‌లో చెబుతున్నాడు అవతలి వ్యక్తి.
''సరే పాలవాడైనా వస్తాడేమో, వచ్చి మెయిన్‌ గేటు తీస్తాడేమో చూడు. వాళ్ళు వచ్చి గేటు తెరిచాకే వెళదాం'' అన్నాడు డీయస్పీ.
మధ్యమధ్యలో అందరితో డీయస్పీ చాలా సరదాగా మాట్లాడు తున్నారు. సమయం గడిచిపోతూనే వుంది
కాసేపటికి డీయస్పీ తన మొబైల్‌ మెసేజ్‌ చూసుకుని ''మెయిన్‌ గేటు తెరిచినట్లు సమాచారం వచ్చింది. ఇక పదా రాజేష్‌'' అని సిఐతో అన్నాడు.
రాజేష్‌ వెంటనే వేగం పెంచాడు. కొన్ని నిమిషాల వ్యవధి లోనే లోకేషన్‌ దగ్గరకు చేరుకున్నారు. అక్కడ ఒకరిద్దరు టీం సభ్యులు ఆ ఇంటికి సమీపంలో తచ్చాడుతూ ఉన్నారు. డీయస్పీ గారికి సమాచారం అందిస్తున్నది వీళ్లే అని అర్థమైంది. బృందం గానే పై పోర్షన్‌లో ఉన్న ఇంటిమెట్లు ఎక్కారు. ఇంటి తలుపు కొట్టాడు టీంలోని మరొక సిఐ.
''తలుపుకు కాలింగ్‌ బెల్‌ ఉంది కదా చూసుకోవా? కొట్టడం దేనికి. మరీ మొరటోడ్లా వున్నావే'' అన్నాడు నవ్వుతూనే మరొక సిఐని డీయస్పీ.
కాలింగ్‌ బెల్‌ కొట్టాడు. కాసేపటికి ఒకతను వచ్చి తలుపు తీశాడు. బహుశా అతను ఇంటి యజమాని అనుకుంటా. అంత మందిని చూసి ఆశ్చర్యపోయి ''ఎవరు మీరు?'' అన్నాడు
''మేం ఏసిబి వాళ్ళం. నీ పేరేమిటి'' అన్నాడు సిఐ రాజేష్‌.
''నా పేరు యాకోబ్‌'' అన్నాడు.
''సువార్తమ్మ ఎవరూ'' అన్నాడు డియస్పీ.
''మా ఆవిడ సార్‌'' అన్నాడు యాకోబ్‌.
''మీ దగ్గర ఆదాయానికి మించిన ఆస్తులున్నాయని సమా చారం వచ్చింది. మీ ఇంటిని సెర్చ్‌ చేయాలి. ఇదిగో కోర్టిచ్చిన సెర్చ్‌ వారెంట్‌.'' అన్నాడు డీయస్పీ.
అంతలోనే కళ్ళు పులుముకుంటూ ఒక పెద్దావిడ బహుశా యాబై ఏళ్ళకు పైనే ఉంటాయి. హాల్లోకి నడిచి వస్తూ ''నేనే సువార్తమ్మ. మీరెవరు?'' అన్నది.
''మేము ఏసిబి వాళ్ళం. మీ పేరు సువార్తమ్మే కదా'' అన్నాడు డీయస్పీ.
ఆమెక్కూడా అన్ని వివరాలు చెప్పి, ''ఇదిగో కోర్టు ఉత్తర్వు ప్రకారం మీ ఇంటిని సోదా చేయాలి. మీరు సహకరించండి.'' అని శ్రీనివాసులును పిలిచి ఈ సెర్చ్‌ వారెంట్‌పై మీ సంతకం పెట్టండి సార్‌'' అన్నాడు డీయస్పీ.
శ్రీనివాసులుతో పాటు మరొక లెక్చరర్‌ కూడా సంతకం పెట్టాడు.
ఆ భార్యాభర్తలు ఆశ్చర్యంగా అందరినీ చూస్తూ నిశ్చేష్టులై నిల్చున్నారు. నోటీస్‌ సువార్తమ్మ చేతిలో పెట్టి 'మీ ఫోన్‌ ఇవ్వండి' అని తీసుకున్నాడు డీయస్పీ. ఆమె భర్త యాకోబ్‌ ఫోను కూడా తీసుకున్నారు.
ఇంట్లో ఇంకెవరెవరు ఉన్నారని అడిగాడు సిఐ రాజేష్‌.
పిల్లలు పక్క బెడ్‌ రూంలో పడుకున్నారని సువార్తమ్మ చెప్పింది.
''వాళ్ళ దగ్గరున్న మొబైల్స్‌, ట్యాబ్స్‌, లాప్‌టాప్స్‌ కూడా తీసుకు రండి.'' అన్నాడు డీయస్పీ ఆమె భర్తను.
ఙఙఙ
ఈశ్వరప్ప నిధుల్ని దిగమింగాడని సొసైటీ అధ్యక్షులు జిల్లా అధికారులకు ఫిర్యాదు చేయడంతో విచారణకొచ్చారు.
''చెప్పండి ఈశ్వరప్ప గారు.. మీరు దాదాపు 5 లక్షల 60 వేలు సొంతానికి వాడుకున్నట్లు సొసైటీ ప్రసిడెంట్‌ మీ మీద కంప్లైంట్‌ చేశారు. దీనికి మీ సమాధానం'' అని విచారణాధి కారులు ప్రశ్నిస్తున్నారు.
''అవన్నీ నకిలీ ఆధారాలు. రికార్డులు తారుమారు చేశారు.'' ఈశ్వరప్ప నిజాయితీగానే సమాధానం చెబుతున్నాడు.
''సొసైటీ సెక్రెటరీ సంరక్షణలో కదా రికార్డులుండాల్సింది. అధ్యక్షుడెలా తారుమారు చేస్తారు.'' అధికారి ప్రశ్నించాడు
''ఇక్కడ తాళాలు రెండుసెట్లుంటాయి. ఒక సెట్టు అధ్యక్షుడి దగ్గర మరొక సెట్టు నా దగ్గర. ఇదేమిటని అడిగాను. ఇవన్నీ అడక్కూడదని నన్ను బెదిరించారు. మినిట్స్‌ పుస్తకం కూడా మరొకటి ఆయనతో ఉంది.'' ఈశ్వరప్ప జవాబిచ్చాడు.
''మరి మా దష్టికి ఎందుకు తీసుకురాలేదు?'' అని ఆ అధికారి ఈశ్వరప్పను ప్రశ్నిస్తూనే సొసైటీ అధ్యక్షుడి వైపు చూసి కనుసైగ చేశాడు.
ఈశ్వరప్పకు అర్థమైంది, కుట్రతోనే ఈ కేసులో తనను ఇరికిస్తున్నారని.
''మీరు అవినీతి చేశారనడానికి ఆధారాలు దొరికాయి. మీరు ఏదైనా ఉంటే కోర్టులో నిరూపించుకోండి. మిమ్మల్ని సస్పెండ్‌ చేస్తున్నాం''అని చెప్పి, అధికారులు బయల్దేరడానికి సిద్ధమయ్యారు.
''సార్‌ నన్ను నమ్మండి. నేను ఏ తప్పూ చేయలేదు. మీక్కూడా తెలుసు, నేను ఏ తప్పు చేయనని. ఇవాళ మీరు అమ్ముడు పోయి ఈ తప్పుడు కేసులో నన్ను ఇరికిస్తున్నారు. ఇది అన్యాయం. సొసైటీ సభ్యులు ఈ ముగ్గుర్ని అడగండి. నేనేమిటో'' అంటూ ఆవేదనగా ఆవేశంతో ఈశ్వరప్ప మాట్లాడుతున్నా పట్టించు కోకుండా కారెక్కి వెళ్ళిపోయారు అధికారులు. ఈశ్వరప్ప సస్పెండ్‌ ఆయ్యాడు.
ఙఙఙ
సువార్తమ్మ ముఖానికి కొంగు అడ్డం పెట్టుకుని ఉంది. ఒక్కొక్క రూంలోంచి పత్రాలు, బంగారం, విలువైన వస్తువులు ఇలా అన్నీ తెచ్చి సిబ్బంది హల్లో వేస్తున్నారు.
''పిల్లలేం చదువుకుంటున్నారమ్మా'' డీయస్పీ సువార్తమ్మను అడిగాడ
ఆమె నోరు విప్పేలోపు వాళ్ళమ్మాయి ''నేను ఎమ్మెస్సీ పూర్తి చేశానుసార్‌. ప్రస్తుతం గ్రూప్స్‌కు ప్రిపేరవుతున్నాను. మా అన్నయ్య మెడిసిన్‌ పూర్తి చేసి పీజికి ప్రిపేర్‌ అవుతున్నాడు'' అంది.
హాల్లో వేసిన డాక్యుమెంట్లను బంగారాన్ని వేటికవే విభజిస్తు న్నారు ఏసిబి అధికారులు. పొలాలు, స్థలాలు, అపార్ట్‌మెంట్లలో ఫ్లాట్లు ఇలా అన్ని పత్రాలు చూస్తూ సువార్తమ్మను ప్రశ్నిస్తున్నారు. ఒకపక్క అధికారులే అందరికీ బ్రేక్‌ఫాస్ట్‌, టీలు అందిస్తున్నారు. వెసులుబాటున్న వాళ్ళను తినమని డీయస్పీ చెబుతున్నాడు. అధికారులు ల్యాప్‌ట్యాప్‌లు కనెక్ట్‌ చేసుకుని ఏవేవో ప్రొఫార్మాలను నింపుతున్నారు. ఆస్తుల వివరాలను నమోదు చేస్తున్నారు. ఈ ఆపరేషన్‌ గురించి సమగ్రంగా తెలుసుకోవాలనే ఆసక్తి శ్రీనివాసులుకు కలిగింది.
''లాకర్‌ తీయడానికి ఒక టీం వెళ్ళండి'' అని మరొక సిఐ అహ్మద్‌ భాషను డీయస్పీ ఆదేశించాడు.
''సువార్తమ్మను కూడా లాకర్‌ తెరవడానికి తీసుకువెళ్ళాలి కదా.. రాజేష్‌ ఆ పని చూడు'' అన్నాడు డీయస్పీ.
సువార్తమ్మను తమ కార్లోనే ఏసిబి అధికారులు బ్యాంక్‌ లాకర్‌ తెరవడానికి తీసుకెళ్ళారు.
''ఎలావుంది ఏసిబి రైడ్స్‌ అనుభవం..'' అని శ్రీనివాసులును ఏసిబి సిఐ పవన్‌ అడిగాడు
''కొత్తగా వుంది.. పవన్‌ సార్‌ ఫ్రీనేనా.. కాసేపు మాట్లాడు కోవచ్చా మనం'' అన్నాడు శ్రీనివాసులు
''అసలు ఇప్పుడు పనేముండదు. అస్తుల వివరాలు బ్యాంక్‌ పాసు పుస్తకాలు ఇతరాలన్నీ దేనికవే విభజించడానికి చాలా టైం పడుతుంది. బ్యాంకు లాకర్‌ నుండి ఏమున్నాయో తీసుకురావాలి. బంగారమైతే అప్రైజర్‌ను పిలిపించి తూకమేయించి లెక్క కట్టాలి. ఈలోపు మనం ఎంతసేపైనా మాట్లాడుకోవచ్చు. డీయస్పీ సార్‌ చాలా షార్ప్‌. అన్ని విషయాల్లో నిక్కచ్చిగా ఉంటారు. పనుంటే ఆయనే ఎవరికి ఏం పని అప్పజెప్పాలో చెప్తాడు. కాబట్టి నోప్రాబ్లం. ఎంతసేపైనా మాట్లాడుకుందాం'' అన్నాడు సిఐ పవన్‌
''సరే.. అవతలికి పోదామా'' అన్నాడు శ్రీనివాసులు.
''వైనాట్‌ '' అంటూ కదిలాడు పవన్‌. ఓ మూల కుదురుకున్నాక, ''ఆ.. ఏమి నీ డౌట్స్‌'' అనడిగాడు.
''అసలు ఈ రైడ్స్‌ ఎలా జరుగుతాయి..'' అన్నాడు శ్రీనివాసులు.
''రైడ్స్‌ రెండు రకాలుగా జరుగుతాయి. ఒకటి : ఏసిబి టోల్‌ఫ్రీ నెంబర్‌కు అవినీతిపై కాల్స్‌ వస్తాయి. అలా వచ్చిన ఫిర్యాదులను రికార్డ్‌ చేసి చాలా పకడ్బందిగా పథకమేసి వలపన్ని పట్టుకోవడం. రెండోది అసెట్స్‌ రైడ్స్‌. ఒక ప్రభుత్వ ఉద్యోగికి ఆదాయానికి మించిన ఆస్తులుండటం. అంటే ఏ ప్రభుత్వ ఉద్యోగి అయినా ఎంతటి స్థాయి ఉన్న ప్రభుత్వ ఉద్యోగం చేస్తున్నా తన ఉద్యోగ జీవితంలో మహా అయితే అయిదు కోట్లు సంపాదిస్తాడనుకుందాం. అంతకు మించి సంపాదిస్తే అక్రమార్జనే కదా..''
''అవును నిజమే'' అన్నాడు శ్రీనివాసులు.
''అయితే ఒక ఉద్యోగిపై ఫిర్యాదు వచ్చిన వెంటనే రైడ్స్‌ జరగదు. ఫిర్యాదులో నిజమెంతో ముందు నిర్ధారించుకుంటారు. చాలా లోతుగా రహస్యంగా ఇన్వెస్టిగేషన్‌ చేస్తారు. కొన్ని నెలలు పట్టొచ్చు. సదరు వ్యక్తి బంధువులను కూడా ట్రేస్‌ చేసి వాళ్ళకు సంబంధించిన సమాచారాన్ని కూడా తీసుకుంటారు. ఒకవేళ అసెట్స్‌ వాళ్ళ ఇళ్ళలో దాచడమో లేదా వాళ్ళ పేర్లపై ఉంచడమో చేసి వుంటారేమో కదా..! ఇవన్నీ చూస్తారు. అన్ని వివరాలతో అధికారులకు నివేదిక పంపి రాష్ట్రస్థాయి అధికారులతోనూ సంప్రదింపులు జరిపి వారి నుంచి అనుమతి వచ్చాక సదరు నివేదికను స్థానిక ఏసిబి కోర్టుకు సమర్పిస్తారు. మెజిస్ట్రేట్‌ సెర్చ్‌ వారెంట్‌ ఇస్తారు. వారెంటు కోర్టు ఇచ్చాకే రైడ్స్‌కు ప్రణాళిక వేస్తారు. ఈ రైడ్స్‌ చేయడానికి వివిధ శాఖల ఉద్యోగులను సాక్షులుగా ఆయా శాఖల ఉన్నతాధికారులకు లేఖలను రాసి తీసుకుంటారు. అలానే మీరు కూడా ఈ రైడ్స్‌కు మీ శాఖ నుండి ఇప్పుడొచ్చింది.'' అన్నాడు సిఐ పవన్‌.
''ఇంకేమైనా డౌట్స్‌ ఉన్నాయా'' అన్నాడు తనే మళ్ళీ..
''సంవత్సరంలో ఎంతమంది మీద రైడ్స్‌ చేస్తారు.''
''అంతమంది ఇంతమంది అనేం లేదు. ఫిర్యాదుల్ని బట్టి అనుమతుల్ని బట్టి ప్రాసస్‌ కంప్లీట్‌ అయ్యిందంటే ఆపరేషన్‌ ప్లాన్‌ చేసుకోవడమే..''
''మీకు వత్తిడి ఏమైనా ఉంటుందా. ఐ మీన్‌ పొలిటికల్‌ ప్రెజర్‌..''
''అసలు సమాచారం బయటకు పొక్కే చాన్స్‌ లేదు కాబట్టి వత్తిడి ఉండదు. ఈ ఇంటిని రైడ్‌ చేస్తున్నామని మా డిపార్ట్‌మెంటులో కూడా హయ్యర్‌ క్యాడర్‌ వాళ్ళకు మాత్రమే తెలుస్తుంది. ఏ దశలోనూ లీక్‌ జరగదు. అంతా ట్రాన్స్‌పరెన్సీగా ఉంటుంది. ఏ మాత్రం మా వాళ్ళు లీక్‌ చేసినట్లు తెలిస్తే క్రమశిక్షణా చర్యలు తీవ్రంగా ఉంటాయి''
అప్పుడే బయటి నుండి డీయస్పీ పిలుపు 'పవన్‌' అని.
''మళ్ళీ మాట్లాడదాం'' అంటూ వెంటనే డీయస్పీ దగ్గరకు వెళ్ళాడు పవన్‌.
''మిగతా చోట్ల పరిస్థితి ఏంటి, కనుక్కున్నావా'' అనడిగారు డిఎస్పీ.
''ఎవ్విరిథింగ్‌ ఓకే సార్‌. కనుక్కున్నా'' అన్నాడు పవన్‌
సువార్తమ్మకు సంబంధించి అందరి బంధువుల ఇళ్ళ వద్ద ఒకేసారి ఏడు టీములు ఏడు చోట్ల సోదాలు చేస్తున్నాయి. ఒక్కొక్క టీము వివరాలన్నీ డీయస్పీకి ఎప్పటికప్పుడు అందిస్తున్నాయి.
ఙఙఙ
ఈశ్వరప్ప సస్పెన్షన్‌ కాలంలోనే రిటైర్డ్‌ అయ్యారు. రావాల్సిన బెన్ఫిట్స్‌ అన్నీ పెండింగులో పెట్టారు. కారణం అతడిపై కేసు కోర్టులో ఉండటం. ఫిర్యాదు చేసిన సొసైటీ అధ్యక్షులు కేసు విత్‌డ్రా చేసుకోడానికి సిద్ధమయ్యాడు. అయితే ఒక కండీషన్‌ పెట్టాడు. తనకాళ్ళు పట్టుకోవాలని షరతు విధించాడు. ఈశ్వరప్ప ఆత్మాభిమానం గల మనిషి. దానికి ససేమిరా అన్నాడు. రాయబారం తెచ్చిన వాళ్ళతో చావైనా చస్తాను గాని.. కాళ్ళు పట్టుకునే ప్రసక్తే లేదన్నాడు.
సువార్తమ్మ ఇంట్లో సోదాలు పూర్తయి డాక్యుమెంట్లు సిద్ధం చేసే సరికి మరుసటి రోజు ఉదయమైంది. ఆమెను అరెస్ట్‌ చేసి రిమాండ్‌కు పంపుతున్నట్లు అక్కడికొచ్చిన విలేకరులతో డీఎస్పీ చెబుతున్నారు
ఒక విలేకరి.. ''సార్‌ ప్రాపర్టీ ఎంత వరకు లభించింది.. ఎన్ని కోట్లని అంచనా వేస్తున్నారు?'' అనడిగాడు.
డీయస్పీ పూసగుచ్చినట్లు వివరించాడు.
మరొక విలేకరి ''రైడ్స్‌ దళితుల మీదనే ఎందుకు జరుగుతున్నాయి? ఇటీవలి కాలంలో ఈ జిల్లాలో చేసిన నాల్గు రైడ్లలలో దళితుల్నే పట్టుకున్నారు. కోట్లు కొల్లగొడుతున్న అగ్రవర్ణ అవినీతిపరులపై దాడులు చేయలేదు. ఫిర్యాదులు అగ్రవర్ణ అధికారుల మీద రాలేదా?'' అనడిగాడు.
''మా శాఖకు వాళ్ళు వీళ్ళనేది ఉండదు. ఫిర్యాదు ఎవరి మీద వచ్చినా చట్టపరంగా ముందుకు వెళతాం. మాకెటువంటి డిస్క్రిమినేషన్‌ ఉండదు.'' అన్నాడు డీయస్పీ
నీతిని నిజాయితీని నమ్ముకున్న ఈశ్వరప్పను తమ మాట వినేలేదని తప్పుడు ఆధారాలతో సస్పెండ్‌ చేయించారు. ఇప్పటికీ కేసు కొలిక్కి రాకుండా ఎంక్వైరీల మీద ఎంక్వైరీలతో కేసు నడుస్తూనే ఉంది. అక్రమంగా సంపాదించిన సువార్తమ్మ దళిత అధికారే.. తను అక్రమంగా సంపాదించిందనే అక్కసుతో తన బంధువులు ఫిర్యాదు చేయడంతో ఈ రైడ్‌ జరిగిందని అసలు ఒకరు ఎదుగుతుంటే ఎలా ఇలా ఎదుగుతారనే ఈర్ష్యతో ఇరుగు పొరుగువాళ్ళే ఫిర్యాదు చేస్తారని అర్థమైంది.
ఇక మేమంతా సువార్తమ్మ ఇంటి నుండి బయలు దేరడానికి సిద్ధమౌతుంటే ఆమె ఇంట్లో షోకేసులో ఫ్రేముకట్టిన బైబిల్‌ వాక్యం నన్ను బాగా ఆకర్షించింది, నీకప నాకు చాలును.. అని!