పెట్టుబడి

గిరిప్రసాద్‌ చెలమల్లు
94933 88201
చెరువు మట్టి తోలి
కుండలు చేసుకుంటున్న వాడి నోట్లో మట్టి కొట్టటానికి
కుండొద్దు రాతెండి ముద్దన్న పెట్టుబడి
అలవాటు పడ్డ జనం
క్యాన్సర్‌ బారిన పడి పోతుంటే
మళ్ళీ కుండనో ఉక్కు వైపో దృష్టి పెట్టిన జనం

ఉప్పో బూడిదో ఏ పుల్లో యేసి
పళ్ళు తోముతుంటే
తెల్ల తెల్లని పొడంటూ పేస్టంటూ
వైద్యుల ప్రకటనల హౌరుతో వెర్రెత్తించి
కాల క్రమేణా ఉప్పుందా ఉసిరుందా యాపుందా అంటూ
ఉసురు పోసుకుంటున్న పెట్టుబడి!

ఇనుప పెంకలో మాడుతుందని
ఊదర గొట్టి నాన్‌స్టిక్‌ అంటూ
టెఫ్లాన్‌ని కడుపులోకి పంపి
మళ్లీ క్యాస్ట్‌ ఐరన్‌ అని విపణిలోకి పెట్టుబడి

పొయ్యిలో బూడిద
నిమ్మకాయతో జిడ్డు వదిలించుకున్న గిన్నెలు
అంట్ల సబ్బుతో తళుక్కు
పేరుకున్న రసాయనాలు వంటలో కలిసి అనారోగ్యం
కట్టెల పొయ్యి కాలుష్యం అంటూ
మరిపించి మురిపించి గ్యాస్‌ బండ అంటగట్టి
గుదిబండ చేసి సంపుతున్న పెట్టుబడి

రాట్నంతో వడికి మగ్గంతో నేసి
సిగ్గుని కప్పిన గుడ్డ
యంత్రాల ఒరవడిలో గుటుక్కుమంది
పోగు పోగు పొల్లు పొల్లున ఏడుస్తుంది

ఆకాశాన్ని అంటిన తాడెక్కి వడిసి వంచిన కల్లు
మద్యం సిండికేట్‌ల పందేరంలో
మండువలో నురుగులు కక్కుతూ సస్తుంది
మండుతున్న కొలిమి ఎర్రబారిన ఇనుము
డాకలిపై దెబ్బలతో పనిముట్టు
ట్రాక్టర్‌ వచ్చింది కొలిమి ఆరిపోయింది
బండి ఇరుసులు నాగళ్ళు చక్రాల నేర్పరితనం
బహుళ అంతస్థుల్లో తలుపుగూళ్ళయ్యింది

ఊరి మధ్య చకచకా గొరిగిన కత్తి
కార్పొరేట్‌ సెలూన్‌ అడకత్తెరలో నలిగి పోతుంది
బట్టలుతికే బండ పాచి బట్టి పోయింది
చౌడు మట్టితో మల్లెల్లా మెరిసిన గుడ్డ
డిటర్జెంట్‌తో మన్నిక కోల్పోయింది
ఇంటి ముందు పెళ్ళిళ్ళు ఫంక్షన్‌ హాళ్ళకి పరిగిడితే
పుస్తె మెట్టెలు బ్రదర్స్‌ కొట్లల్లో
బోసిపోయిన స్వర్ణకారుల ఇళ్ళు
నీళ్ళ క్యాన్ల రాకతో బిందెలు కాగులటకెక్కి
కంచరితనాన్ని కంచానికి దూరం చేసింది!

పెట్టుబడి విషమైనా అమ్ముతుంది
మనల్ని కొనేట్లు చేస్తుంది
ఏది అవసరమో మనకెరుకనంత కాలం
పెట్టుబడి చిమ్మేది విషమే
మానవ సంహారం మానవునికి తెలీకుండానే...!